१५ बैशाख २०८२, सोमबार
जुम्लाः नेकपा (माओवादी केन्द्र) पातारासी गाउँपालिका कमिटिको अध्यक्षमा भक्तबहादुर बुढा सर्वसम्मत चयन हुनुभएको छ ।
उक्त पालिकामा आइतबार आयोजित दोस्रो अधिवेशनले बुढाको अध्यक्षमा ४५ सदस्यीय पालिका कमिटि गठन भएको नेकपा माओवादी केन्द्र जुम्लाका सचिव नवीन शर्माले जानकारी दिनुभयो ।
बुढा दोस्रो कार्यकालको लागि पालिका अध्यक्षमा सर्वसम्मत चयन हुनुभएको हो ।
त्यस्तै, उपाध्यक्षमा पूर्णराज बुढा, एलिना बुढा र रुप्सी महतारा, सचिवमा गौरीशंकर बुढा, कोशाध्यक्ष बाँचु बुढा र सहसचिव धर्मसिंह थापा निर्वाचित भएको पार्टी सचिव शर्माले बताउनुभयो ।
आईतबार भएको पालिका अधिवेशनको उद्घाटन माओवादी केन्द्रका कर्णाली प्रदेश इन्चार्ज कालीबहादुर मल्लले गर्नुभएको थियो । उक्त उद्घाटनमा माओवादी केन्द्र जुम्लाका इन्चार्ज नरेश भण्डारी, सहइन्चार्ज गोमा गौतम, वैकल्पिक केन्द्रीय सदस्य, प्रदेश कमिटी सदस्य, केन्द्रीय सदस्यलगायतको उपस्थिति रहेको थियो । माओवादी केन्द्रको जिल्लाका आठवटा स्थानीय तहमध्ये पातारासी र गुठीचौर गाउँपालिकाको अधिवेशन सम्पन्न भएको छ ।
त्यसैगरी, नेकपा (माओवादी केन्द्र) जुम्लाले हिमा, तातोपानी पातारासी, गुठीचौरका वडाको अधिवेशन सम्पन्न गरेको छ भने कनकासुन्दरीका २ वडा र चन्दननाथ नगरपालिका १ वडाको अधिवेशन सम्पन्न भएको जनाइएको छ । यसपछि भने तिला, सिंजा र चन्दननाथका वडाको अधिवेशन गर्ने तयारी भइरहेको सचिव शर्माले जानकारी दिनुभयो ।
