२३ फागुन २०८१, शुक्रबार
सुर्खेतः प्रधानमन्त्री केपी शर्मा ओलीले कर्णाली प्रदेश आफ्नो हिसाबले विकासको अत्यन्तै सुन्दर संभावना भएको बताउनुभएको छ ।
कर्णाली प्रदेशसभाको दोस्रो कार्यकालको पाँचौं अधिवेशनको १४औं बैठकलाई सम्बोधन गर्दै प्रधानमन्त्री ओलीले कर्णाली उर्जा, कृषि, पशुपालन, फलफुल, औषधीजन्य जडिबुटी, उर्जा उत्पादनका हिसाबले अत्यन्तै धनी प्रदेश हो भन्नुभयो । इतिहास, दुर्लभ चीज, खानीका हिसाबले पनि कर्णाली सम्पन्न प्रदेश भएको उहाँले दावी गर्नुभयो ।
यहाँका अधिकांश जिल्ला घुमेको, हेरेको, देखेको, अध्ययन गरेको र धेरै बुझेको बताउँदै प्रधानमन्त्री ओलीले यो भूगोल निर्माणका लागि केन्द्र सरकार पूर्णरुपले साथमा रहेको धारणा व्यक्त गर्नुभयो । उहाँले भन्नुभयो, “कर्णालीको दुःखप्रति सरकार जानकार छ । जाजरकोट भूकम्पको पुनः निर्माण, कर्णाली तथा भेरी करिडोरलगायतका विकास निर्माणका लागि हामी लागि परेका छौं ।”
अहिले ९८ प्रतिशत गाउँ घरमा विद्युत, ९२ प्रतिशतमा खानेपानी पुगेको छ भन ८७ प्रतिशत भन्दा माथि साक्षरता रहेको जनाउँदै उहाँले फुसको छानालाई हटाएर जस्ता, ज्येष्ठ नागरिकलाई रु.एकमा खाता खोल्ने, बीमा गर्ने तयारीमा सरकार रहेको बताउनुभयो । नेपाली जनताको त्याग र बलिदानबाट ल्याएको लोकतन्त्र सफलता साथ अगाडि बढेको, सडक, हवाई यातायात, विद्युत, सञ्चार सुविधामा बढोत्तरी आएको बताउनुभएका उहाँले भेरी बबई डाइभर्सन आयोजना त्यति राम्रोसँग अगाडि नबढेको जनाउनुभयो ।
भ्रष्टाचार नियन्त्रणमा सरकार पूर्णरुपले लागेको बताउँदै प्रधानमन्त्री ओलीले भन्नुभयो, सरकारले कर्णालीमा पनि कर्णाली स्वास्थ्य विज्ञान प्रतिष्ठान जुम्ला, मध्यपश्चिम विश्वविद्यालय, राकम कर्णालीलगायतका ठूला संरचना खोलेको छ । कर्णाली भेरी करिडोर बनाउन लागि परेका छौं । अब पक्की बाटो र पुल बनाउन बाँकी । पूर्वाधारको क्षेत्रमा ठूलो प्रगति गरेका छौं ।”
लोकतन्त्रमा नागरिक सर्वोच्चता हुन्छ जुन प्रणाली हाम्रो ठूलो स्वाभिमान हो । यसलाई प्रभावकारी र सुदृढ कसरी गर्ने भन्ने हेतुले संविधान जारी गरेका छौं । संविधान समग्र राष्ट्रका समस्या सम्बोधन गर्न ल्याइएको दस्ताबेज हो । अब सरकारको कर्तव्य जनताको बलिदानबाट ल्याएको गणतन्त्र कार्यान्वयन हो । सबै कुरामा होइन, राष्ट्रिय आवश्यकतालाई सम्बोधन गर्ने गरी संविधान संशोधन हुन्छ । जुन गठबन्धन सरकारको सहमतिको दोस्रो बुँदामा उल्लेख गरिएको छ ।
अहिलेको सरकार दुई ठूला दलको गठबन्धनबाट असाधारण अवस्थामा बनेको सरकार भएकोले देशको प्रणाली मात्र नभई देश नै बचाउने उहाँको जिकिर थियो । संविधान र संघीयता नै खतरामा पर्ने अवस्था आएपछि दुई शक्तिबीचको समीकरण भएको हो उल्लेख गर्दै प्रधानमन्त्री ओलीले टुट्नेवाला सरकार नभई लक्ष्य पुरा गर्नका लागि आगामी ०८४ सम्म मजबुत भएर जाने बताउनुभयो ।
उहाँले कसैलाई आफू लोकप्रिय छु भन्ने लागे विस.२०८४ पर्खन चुनौति दिँदै उहाँले भन्नुभयो, “जनभावना र आकांक्षा अनुसार यही सरकारले केही काम गर्छ । विज्ञान प्रविधिको प्रयोग गरेर नयाँ ढंगले विकासको काम गर्नुछ । देशको मुहार फेर्ने अभिभारा हाम्रो काँधमा छ । स्थिरता र स्थायित्वसहितको सुशासनको मार्गमा अगाडि बढेको अहिले सरकार हो । ढुक्क साथ अगाडि बढ्नुस् ।”
