१८ फागुन २०८१, आईतबार
उपप्रधान तथा सहरी विकासमन्त्री प्रकाशमान सिंहले राजनीतिक स्थायित्वका लागि काँग्रेस–एमालेबीच गठबन्धन भएको बताउनुभएको छ ।
प्रेस युनियन सुर्खेतद्वारा आज सुर्खेत विमानस्थलमा आयोजित ‘पत्रकार भेटघाट’ कार्यक्रममा बोल्दै उपप्रधानमन्त्री सिंहले मुलुकको विकास र जनताको चाहना अनुसार दुई ठूला दलबीचको गठबन्धन सरकार बनेको बताउनुभयो । उहाँका अनुसार अहिले देखिएका समस्या समाधान तथा जनताले चाहेका अपेक्षा पुरा गर्न यो सरकार अगाडि बढिरहेको छ ।
उहाँले भन्नुभयो, “विसं.२०७२ सालमा संघीय लोकतान्त्रिक गणतन्त्रात्मक समावेशी संविधान जारी गरिसकेपछि स्थानीय, प्रदेश र संघको सबै निर्वाचन सम्पन्न भयो । यद्यपि राजनीतिक स्थायित्व हुन नसक्दा विकासका अपेक्षित काम कोही सरकारबाट हुन सकेनन् । परिणामतः मुलुकका दुई ठूला दलबीचको गठबन्धनको सरकार बन्यो ।”
काँग्रेस एमालेबीचको समीकरणमा नयाँ सरकार बनेपनि पहिलेकै सरकारले ल्याएको बजेटमा काम गर्नुपरेको बताउँदै मन्त्री सिंहले मन्त्रालयगत कार्यसम्पादनको पनि मूल्याङकन भइरहेको र लक्ष्य अनुसार काम गर्न सरकार निरन्तर अगाडि बढेको जनाउनुभयो । अध्यादेश बलमिचाईबाट आएको नभई नेपालको संविधानले व्यवस्था गरे बमोजिम सदन नचलेको बेला सरकारको कामकाज गर्न ल्याइएको र यो अभ्यास यस अघिका सरकारहरुले पनि गरेको उहाँले जिकिर गर्नुभयो ।
उहाँका अनुसार आर्थिक अनुशासन कायम गर्ने ध्येयका साथ आयोजनाहरु अगाडि बढाउनेतर्फ सरकार लागिरहेको छ । १५औं महाधिवेशन सभापतिको को उठ्छ भन्ने पत्रकारहरुको प्रश्नमा समय आएपछि त्यो थाहा हुने प्रतिक्रिया दिँदै पार्टीको विधान, नीति र कार्यविधि अनुसार महाधिवेशन हुन्छ । युक्रेनी राष्ट्रपति भ्लोदोमिर जेलेन्स्की र अमेरिकी राष्ट्रपति डोनाल्ड ट्रम्पको तीक्त संवादपछि भंग वार्ताका विषयमा सरकारको आधिकारिक धारणा आउने उपप्रधानमन्त्री सिंहले बताउनुभयो ।
