१० माघ २०८१, बिहीबार
दश महिनादेखि नेतृत्वविहीन अवस्था रहेका कर्णाली प्रदेशसभाका तीन संसदीय समितिहरुले पूर्णता पाएका छन् ।
गत वैशाखदेखि नेतृत्वविहीन रहेका सार्वजनिक लेखा, सामाजिक विकास, अर्थ तथा प्राकृतिक स्रोत समिति आजबाट नेतृत्व पाएका छन् । लेखा समितिको सभापतिमा नेकपा माओवादी केन्द्रका विन्दमान विष्ट, अर्थ तथा प्राकृतिक स्रोत समितिको सभापतिमा नेकपा एमालेकी दक्षिणा शाही र सामाजिक विकास समितिको सभापतिमा नेपाली कांग्रेसका पूर्णबहादुर खत्री निर्वाचित हुनुभएको छ ।
कार्यबहाक सभामुख यशोदाकुमारी न्यापानेले नवनिर्वाचित समितिका सभापतिहरुलाई आजै पद तथा गोपनियताको शपथ ग्रहण गराउनुभएको छ । प्रदेश मामिला समितिको सभापतिमा भने एकीकृत समाजवादीका प्रदेशसभा सदस्य कल्याणी खड्का निरन्तर हुनुहुन्छ ।
यसअघि लेखा समितिको सभापतिमा एमालेका जीतबहादुर मल्ल, अर्थ तथा प्राकृतिक स्रोत समितिका सभापतिमा दुर्गबहादुर रावत र सामाजिक विकास समितिका सभापति रहेका घनश्याम भण्डारी रहनुभएको थियो । लामो समयसम्म समिति नेतृत्वविहीन हुँदा सरकारका कामकारवाही निगरानी गर्नेदेखि समितिमा गएका विधेयक उपर छलफल हुन सकेको थिएन । अब भने उक्त समस्या टरेको छ ।
