१४ पुस २०८१, आइतबार
कर्णाली प्रदेशको राजधानी वीरेन्द्रनगर सुर्खेतमा ‘मानव स्मारक’ बनाउन रु.नौ करोड ७६ लाख ९२ हजार आठ सय ४३ संकलन भएको छ । यही मंसिर २१–२८ गतेसम्म वीरेन्द्रनगरमा सञ्चालन भएको श्रीमद् भागवत् सप्ताह ज्ञान–विज्ञान महायज्ञबाट उक्त रकम संकलन भएको हो ।
महायज्ञ सञ्चालन मूल आयोजक समितिले आज पत्रकार सम्मेलनमार्फत सप्ताहबाट संकलित रकम सार्वजनिक गर्दै उक्त रकमबाट मानव सेवा आश्रमको कर्णाली प्रदेशस्तरीय भवन अर्थात ‘मानव स्मारक’ निर्माण गर्ने जनाएको छ । मूल आयोजक समितिका संयोजक डा.नवराज केसीले रु.पाँच करोडको लक्ष्य राखिएकोमा करिब दोब्बरले दान संकलन भएको बताउनुभयो । “महायज्ञमा रु.एकदेखि एक करोडसम्म रकम दान गर्नुभएको छ,” संयोजक केसीले भन्नुभयो, “यसमा हामीले समुदायलाई जोडेका छौं ।”
महायज्ञबाट रु.एक करोड ९७ लाख ६६ हजार ६५ नगद, एक करोड ३३ लाख २७ हजार छ सय एक क्यूआर तथा अनलाइन माध्यमबाट प्राप्त भएको महायज्ञ मूल आयोजक समितिका कोषाध्यक्ष टिकाराम चपाइले जानकारी दिनुभयो । रु.३७ लाख ८८ हजार नौ सय २१ रकम बराबरको चेक प्राप्त भएको र रु.पाँच करोड चार लाख १६ हजार ३२ स्थानीय तह र विभिन्न संघ संस्थाहरुले दिने प्रतिबद्धता गरेको उहाँले बताउनुभयो । उहाँका अनुसार त्यसमा रु.५७ लाख ७९ हजार पाँच सय ८२ व्यक्तिगत प्रतिबद्धता भएको छ ।
महायज्ञ मूल आयोजक समितिका अनुसार कलश यात्रामा प्रयोग भएको कलश बिक्रीबाट रु.४२ लाख ७४ हजार आठ सय ८२ र दान पेटिकामा रु.तीन लाख २६ हजार चार सय ५५ तथा किताब बिक्रीबाट १३ हजार तीन सय पाँच संकलन भएको छ । रु.५० लाख ७४ हजार ८७ महायज्ञ सञ्चालनको क्रममा प्रचार प्रचार, यातायात, खाद्यान्न तथा भान्सा, विद्युत्, इन्धन, अतिथि सत्कार खर्च भएको छ ।
संकलित रकमबाट वीरेन्द्रनगर नगरपालिका ११ स्थित गंगामाला धार्मिक वन तथा देउती बज्यै सामुदायिक वन समितिले प्रदान गरेका २९ बिघा जग्गामा मानव सेवा आश्रमको प्रदेशस्तरीय ‘मानव स्मारक’ भवन निर्माणको कार्य थालनी गरिने संयोजक केसीले बताउनुभयो । भवन निर्माणका लागि रु.नौदेखि ११ करोड लागत लाग्ने अनुमान गरिएको उहाँको भनाई छ ।
डा.केसीका अनुसार सरकारको पूँजीले मात्र भवन निर्माण सम्भव नहुने भएकोले महायज्ञमार्फत समाज तथा समुदायबाट पूँजी संकलन गरिएको हो । अबको दुई÷तीन महिनामै भवन निर्माण कार्य अगाडि बढाउने तयारी भइरहेको छ । भवनमा सडक आश्रित मानवको उद्धारका लागि मात्र नभई मानव धर्म के हो ? भन्ने बारे बुझाउने मानवता अध्ययन केन्द्रको समेत स्थापना गरिनेछ ।
मानव सेवा आश्रमले ‘मानव स्मारक भवन निर्माणका लागि एउटा छुटै विकास समिति गठन गर्ने र सो समितिले नै भवन निर्माण कार्य सम्पन्न गर्ने बताइएको छ । कर्णाली प्रदेश सरकारले पनि भवन निर्माणका लागि चालु आर्थिक वर्षमा रु.एक करोड बजेट दिने घोषणा गरेको छ । उक्त महायज्ञमा भागवत भाष्कर कमलनयन गौतम प्रमुख कथा वाचक रहेर निःशुल्क कथा वाचन गर्नुभएको थियो ।
