१० मंसिर २०८१, सोमबार
कर्णाली प्रदेश सरकारका उद्योग, पर्यटन, वन तथा वातावरणमन्त्री सुरेश अधिकारीले उद्यमीहरुका लागि कर्णालीमा लगानीमैत्री वातावरण बनाउन सरकार लागि परेको बताउनुभएको छ ।
दशौं राष्ट्रिय उद्योग दिवसको अवसरमा आज सुर्खेत वीरेन्द्रनगरमा आयोजित मूल समारोहमा बोल्दै मन्त्री अधिकारीले यहाँको उत्पादनमा वृद्धि र रोजागरी सिर्जना गर्न लगानीको खाँचो रहेको जनाउनुभयो । उहाँले भन्नुभयो, “यसका लागि अब बैंक तथा वित्तिय संस्थाहरुलाई बोलाएर छलफल चलाउँछु । भएका कानूनी जटिलतालाई हटाएर एकीकृत कानून निर्माण गर्छौ ।”
उद्योगीहरुको श्रम र सिर्जनामा सघाउने तथा श्रम संस्कृतिको विकासमा युवा जनशक्ति प्रेरित हुने गरी सरकारले साथ दिने उहाँको भनाई थियो । लघु औद्योगिक ग्राम सुर्खेतका अध्यक्ष उदिराम डाँगीले कर्णालीमा लगानी, पूर्वाधार र प्रविधिको अभाव भएको बताउनुभयो । उहाँले भन्नुभयो, “विद्युतको पावरले काम नगर्दा लघु तथा साना घरेलु उद्योगहरु सञ्चालनमा समस्या छ । यसलाई समाधान गर्न सरकारको बैलेमा ध्यान जाओस् ।”
लघु औद्योगिक ग्राममा २४ उद्योगबाट एक सय चार जनाले प्रत्यक्ष रोजगारी पाएको र अहिले पनि दुई सय जनाको खाँचो रहेको उहाँको भनाई थियो । अध्यक्ष डाँगीका अनुसार सर्टिफिकेट भएका मान्छेसँग सीप नभएको तर सर्टिफिकेट नभएका मान्छेहरुको सीप उपयोग गर्ने वातवारण नभएकोले कर्णालीको उत्पादनमा वृद्धि ल्याउन उद्यमीमैत्री लगानीमा ध्यान दिनुपर्दछ ।
उद्योग बाणिज्य संघ सुर्खेतका अध्यक्ष लक्ष्मण कँडेलले उद्यमशीलता कुनै पनि देशको आर्थिक विकासको मेरुदण्ड भएको बताउनुभयो । कर्णाली लघु तथा घरेलु उद्योगको ठूलो संभावना क्षेत्र भएको बताउँदै उहाँले उद्यमशीलताबाट मात्र श्रम, रोजगारी र उत्पादन बढ्ने जनाउनुभयो ।
उद्योग तथा उपभोक्ता हित संरक्षण निर्देशनालय सुर्खेतका निर्देशक पदम लामिछानेले कर्णालीका विभिन्न प्रकृतिका ४१ हजार उद्योग भएको जनाउदै उद्यमशील संस्कृति आजको अपरिहार्य आवश्यकता भएको बताउनुभयो । उक्त कार्यक्रममा उद्योग क्षेत्रबाट कर्णालीको उद्यमशील संस्कृति र राष्ट्रको समृद्धिमा योगदान पुर्याउने उद्यमीहरु पवित्राकुमारी शाही, लक्ष्मी कार्की, मोहनप्रसाद जैसी र हेमन्तकुमार दर्लामीलाई सम्मान गरिएको थियो ।
