२ मंसिर २०८१, आईतबार
कर्णालीका प्रदेशका विभिन्न स्थानीय तहमा रिक्त रहेका आठ जनप्रतिनिधिको पदमा ४४ जनाले मनोनयन दर्ता गराएका छन् ।
निर्वाचन आयोग नेपालको कार्यतालिका अनुसार यही मंसिर १६ गते हुने उपनिर्वाचनका लागि ४४ जनाले उम्मेदवारी दिएका हुन् । कर्णालीमा नलगाड नगरपालिकाका उपप्रमुख, महावु गाउँपालिका दैलेखका अध्यक्ष, सर्केगाड गाउँपालिका उपाध्यक्षका साथै विभिन्न स्थानीय तहमा पाँच वडाध्यक्षको निधन भएपछि रिक्त रहेको पदमा उपनिर्वाचन हुन लागेको हो ।
नगर उपप्रमुखका लागि छ, गाउँपालिका अध्यक्ष र उपाध्यक्ष पदका लागि सात÷सात पाँच वडाध्यक्ष पदका लागि २४ जनाले आ–आफ्नो मनोनयन निर्वाचन कार्यालयमा पुगेर दर्ता गरेको निर्वाचन अधिकृतको कार्यालयहरुले जानकारी दिएका छन् ।
जाजरकोटको नलगाड नगरपालिकाको उपप्रमुखमा छ जनाको उम्मेदवारी परेको छ । नेपाली कांग्रेसबाट निर्वाचित नलगाड नगरपालिका उपप्रमुख सरिता सिंहको विसं.२०८० कात्तिक १८ गतेको भूकम्पमा परी निधन भएपछि रिक्त रहेको पदमा नेपाली कांग्रेसबाट ईन्द्रा चन्द सिंह, नेकपा एमालेबाट सुनिता बोहरा, नेकपा माओवादी केन्द्रबाट देवका लामिछाने, राप्रपा नेपालबाट सुनिता पुन रावल, राष्ट्रिय स्वतन्त्र पार्टीबाट पार्वती पुन, नेपाल समाजवादीबाट पवित्रा जैशीले मनोनयन गर्दा गर्नुभएको छ ।
दैलेखको महावु गाउँपालिकाको अध्यक्ष पदका लागि सात जनाको उम्मेदवारी परेको छ । मुख्य निर्वाचन अधिकृतको कार्यालय गैडाबाज दैलेखका अनुसार नेपाली कांग्रेसबाट झलकबहादुर भण्डारी, नेकपा माओवादी केन्द्रबाट जंगबहादुर बराल मगर, नेकपा एकीकृत समाजवादीबाट जगतबहादुर हमाल, नेकपा एमालेबाट जंगबहादुर शाही, राष्ट्रिय स्वतन्त्र पार्टीबाट प्रकाशकुमार बुढा, राप्रपाबाट सुर्जे रावत र नेपाल मजदुर किसान पार्टीबाट दुर्गबहादुर मगरले अध्यक्ष पदका लागि मनोनयन दर्ता गर्नुभएको छ ।
त्यसैगरी, दुल्लु नगरपालिका १३ दैलेखको वडाध्यक्ष पदका नेपाली कांग्रेसबाट रेशमबहादुर शाही, नेकपा एमालेबाट लालबहादुर शाही, नेकपा माओवादी केन्द्रबाट ढकेन्द्र शाही, नेमकिपाबाट पूर्णप्रसाद उपाध्याय, राष्ट्रिय स्वतन्त्र पार्टीबाट रामबहादुर शाही र राष्ट्रिय प्रजातन्त्र पार्टीबाट रेशम मल्ल गरी छ जनाले उम्मेदवारी दिनुभएको छ ।
दैलेखको महाबु गाउँपालिका अध्यक्ष निर्वाचित काँग्रेसका लछुमन गुरुङको ७६ वर्षको उमेरमा विसं.२०७९ माघ २७ गते निधन भएको थियो । एमालेबाट निर्वाचित दुल्लु नगरपालिका १३ का वडाका वडाध्यक्ष बिर्खबहादुर शाहीको ६५ वर्षको उमेरमा विसं.२०८० माघ २२ गते निधन भएको थियो ।
हुम्लाको सर्केगाड गाउँपालिकाका उपाध्यक्षका लागि सात जनाको उम्मेदवारी परेको छ । गाउँपालिका उपाध्यक्ष चन्द्रसिंह कार्कीको सुर्खेतबाट नेपालगञ्ज जाने क्रममा बस दुर्घटना हुँदा विसं.२०८१ भदौ ४ गते मृत्यु भएको थियो । उहाँ माओवादी केन्द्रबाट गाउँपालिका उपाध्यक्ष निर्वाचित भएका हुनुभएको थियो ।
नेपाली कांग्रेसका सबिता बुढा, नेकपा एमालेका जाना शाही, नेकपा माओवादी केन्द्रबाट देवकी तिमिल्सेना, राप्रपाबाट संगीता शाही र राष्ट्रिय स्वतन्त्र पार्टीबा बाँचा बुढाले उपाध्यक्ष पदमा उम्मेदवारी दिएका छन् । सो पदका रामसरा खड्का साउद र नरेश शाहीले स्वतन्त्र उम्मेदवारी दिएको जनाइएको छ ।
त्रिपुरासुन्दरी नगरपालिका ५ डोल्पाको रिक्त वडाध्यक्ष पदको उपनिर्वाचनमा चार जनाको उम्मेदवारी दर्ता भएको छ । यहाँ कांग्रेसबाट राजेन्द्रप्रसाद न्यौपाने, एमालेबाट नरबहादुर रोकाय, नेकपा माओवादी केन्द्रबाट नरबहादुर झाक्री र नेकपा एकीकृत समाजवादीबाट ज्योति घर्तीको उम्मेदवारी परेको छ । नेकपा एमालेबाट निर्वाचित वडाध्यक्ष नन्दलाल रोकाको विसं.२०८० माघ महिनामा मृत्यु भएको थियो ।
तिलागुफा नगरपालिका ४ कालीकोटको वडाध्यक्ष पदका लागि छ जनाको उम्मेदवारी परेको छ । नेपाली कांग्रेसबाट पैलबहादुर शाही, एमालेबाट ऐनबहादुर शाही, नेमकिपाबाट खड्कराज शाही, नेकपा माओवादी केन्द्रबाट नौशोभा शाही, राप्रपाबाट गोगनबहादुर शाही र राष्ट्रिय स्वतन्त्र पार्टीबाट गगन बमले उम्मेदवारी दर्ता गराएको मुख्य निर्वाचन अधिकृत आनन्दराज पन्तले जानकारी दिनुभयो । माओवादी केन्द्रबाट वडाध्यक्ष निर्वाचित परबहादुर शाही विसं.२०७९ असोज २३ गते राँचुलीमा आएको खोलाको बाढी परी बेपत्ता भएका थिए ।
त्यस्तै, जाजरकोटको कुशे गाउँपालिका ७ जाजरकोट मा हुने वडाध्यक्षको निर्वाचनका लागि चार जनाको उम्मेदवारी दर्ता भएको छ । कांग्रेसबाट खम्बबहादुर सिंह, एमालेबाट डम्मरबहादुर घर्ती, नेकपा माओवादी केन्द्रबाट गोरखबहादुर नेपाली र राप्रपाबाट लालबहादुर खत्रीको उम्मेदवारी दर्ता भएको छ । यहाँ माओवादी केन्द्रबाट निर्वाचित वडाध्यक्ष मनबहादुर घर्तीको विसं.२०७९ असार ४ गते निधन भएको थियो ।
रुकुमपश्चिम भागमा पर्ने सानीभेरी गाउँपालिका ५ को वडाध्यक्षका लागि चार जनाको उम्मेदवारी परेको छ । कांग्रेसबाट निर्वाचित वडाध्यक्ष अलबहादुर खत्रीको विसं.२०८० माघ २० गते जण्डिसका कारण निधन भएपछि रिक्त रहेको उक्त पदमा कांग्रेसबाट मोतिराम खत्री, नेकपा माओवादी केन्द्रबाट जसीराम बस्नेत र नेकपा एकीकृत समाजवादीबाट हंसराज पुरीले उम्मेदवारी दिनुभएको छ । वीरबहादुर बस्नेतले स्वतन्त्र उम्मेदवारी दिएको जनाइएको छ ।
