१७ असोज २०८१, बिहीबार
कर्णाली प्रदेश उद्योग, पर्यटन, वन तथा वातावरणमन्त्री सुरेश अधिकारीले प्रभावकारी सेवा प्रवाह तथा राजश्व वृद्धिमा ध्यान दिन कर्मचारीहरुलाई निर्देशन दिनुभएको छ ।
आज डिभिनजन वन कार्यालय सुर्खेत वीरेन्द्रनगरस्थित नवनिर्मित भवनको उद्घाटन कार्यक्रममा बोल्दै मन्त्री अधिकारीले कर्णाली प्रदेशमा राजश्व संकलनको मुख्य आधार उद्योग, पर्यटन र वन क्षेत्र नै भएको भएको बताउनुभयो । “भवन सुविधा सम्पन्न बनेको छ,” उहाँले भन्नुभयो, “अब यहाँबाट प्रभावकारी सेवा प्रवाह गर्नुस् र राजश्व वृद्धि हुने क्रियाकलापमा विशेष जोड दिनुस् ।”
कर्णालीमा धेरै ठूलो उद्योग नभएपनि पर्यटन, जडीबुटी र वन राजश्व संकलनको मुख्य स्रोत भएको मन्त्री अधिकारीको भनाई थियो । सुविधासम्पन्न भवन निर्माण भइसकेकोले बिगतको जस्तो कर्मचारीलाई काम गर्न समस्या नहुने भन्दै उहाँले नागरिकले देख्ने र महसुस हुने गरी काम गर्न कार्यालय प्रमुखसहित सम्पूर्ण कर्मचारीहरुलाई निर्देशन दिनुभयो ।
डिभिजन वन कार्यालय सुर्खेतका डिभिजन वन अधिकृत बसन्तबाबु श्रेष्ठले नवनिर्मित भवन प्रदेश सरकारको आफ्नै बजेटमा भ्याटसहित रु.दुई करोड १७ लाखमा निर्माण भएको बताउनुभयो । भवन भूकम्प प्रतिरोधी र अपाङ्गतामैत्री बनाइएको उहाँको भनाई थियो । अधिकृत श्रेष्ठका अनुसार उक्त भवन शर्मिला निर्माण सेवा कालीकोटले निर्माण गरेको थियो ।
