३१ साउन २०८१, बिहीबार
‘कुपोषण मुक्त कर्णाली प्रदेशका लागि ईनफ अभियान’ का लागि शुभारम्भ गरिएको छ । कर्णाली प्रदेश सरकारका मुख्यमन्त्री यामलाल कँडेलले अभियानको शुभारम्भ गर्नुभएको हो ।
अभियानको शुभारम्भ कार्यक्रमलाई सम्बोधन गर्दै मुख्यमन्त्री कँडेलले कुनै बेला सिंहदरबारलाई पोषिला र मूल्यवान खाद्यान्न कोशेलीका रुपमा पठाउने कर्णाली पछिल्लो समय कुपोषित बन्नु बिडम्बना ! भएको टिप्पणी गर्नुभयो । उहाँले भन्नुभयो, “आजपनि कर्णालीको रैथाने अन्न उत्पादनको क्षेत्र हो । आजको कर्णालीमा देखिएको खाद्य र कुपोषणको जुन समस्या छ यो परिस्थिलाई बदल्न जरुरी छ ।”
कर्णालीमा कुपोषणको अन्त्यका लागि सबै सरोकारवालाहरु सँगसँगै अगाडि बढ्न आग्रह गर्नुभएका उहाँले कर्णालीमा नीजि क्षेत्र तथा गैरसरकारी संस्थालाई सरकारसँग हातेमालो गर्दै काम गर्न सुझाउनुभयो । प्रदेश सरकारका भूमि व्यवस्था, कृषि तथा सहकारीमन्त्री विनोदकुमार शाहले स्वस्थ कर्णाली निर्माणका लागि कुपोषण अन्त्यमा सरकारको ध्यान गएको बताउनुभयो ।
प्राङ्गारिक उत्पादनबाट कुपोषण न्यूनीकरण गर्ने कर्णालीको योजना रहेको बताउँदै उहाँले कृषि क्षेत्रमा लगानी बढाउन आवश्यक रहेको जनाउनुभयो । सामाजिक विकास मन्त्री घनश्याम भण्डारीले बालबालिकाको वृद्धि विकास र स्वस्थ नागरिक निर्माणमा पोषणयुक्त खाना अत्यावश्यक रहेको धारणा राख्दै अभिभावक, सरकार, साझेदार सबैको सहकार्यमा कुपोषणमुक्त कर्णाली बनाउन सकिने बताउनुभयो ।
उहाँका अनुसार कर्णालीमा पर्याप्त पोषणयुक्त खाद्यान्न उत्पादन हुने भएकाले यसको वितरण, उपभोग र स्वस्थ आहारबारे जनचेतना फैलाउन आवश्यक छ । कर्णाली प्रदेश योजना आयोगका सदस्य अशोकनाथ योगीले कर्णालीलाई कुपोषणमुक्त बनाउन आगामी पञ्च वर्षीय योजनाबाट कार्यान्वयनमा जोड दिने बताउनुभयो ।
वल्र्ड भिजन इन्टरनेशनल नेपाल, सामुदायिक रेडियो प्रसारक संघ (अकोराब), किर्डाक तथा सामाजिक सेवा केन्द्र नेपाल र पाँचतारा युवा संरक्षक मञ्चको संयुक्त आयोजनामा अभियान शुभारम्भको कार्यक्रम गरिएको थियो । कार्यक्रममा वल्र्डभिजन इन्टरनेश्नल नेपालका एडभोकेसी म्यानेजर श्याम अधिकारीले नेपाल सरकारले लिएका नीति तथा योजनालाई पूरा गर्न इनफ अभियानले सघाउने धारणा राख्नुभयो ।
जुम्ला, जाजरकोट र दैलेखसहितका ४३ वडामा वल्र्डभिजनले काम गरिरहेको जानकारी दिँदै उहाँले ‘नेपाली जुटौँ, बालविवाह रोकौँ’ अभियानपछि इनफ अभियान सुरुआत गरिएको जनाउनुभयो । अभियान सफल गराउन तीनै तहका सरकारसँग समन्वय आवश्यक भएको बताउँदै उहाँले अभियानको अपनत्व प्रदेश र स्थानीय सरकारले लिनुपर्नेमा जोड दिनुभयो ।
कार्यक्रममा गैरसरकारी संस्था महासंघका केन्द्रीय सचिव गोविन्द शाहीले कुपोषणमुक्त प्रदेश निर्माण गर्न सरकारी तथा गैरसरकारी निकाय ऐक्यवद्धता जरुरी रहेको बताउनुभयो । अन्तर्राष्ट्रियस्तरमा पनि कुपोषणको अवस्था डरालाग्दो देखिँदै गएको भन्दै उहाँले कर्णाली प्रदेशमा शुभारम्भ भएको इनफ अभियान सफल बनाउन गैरसरकारी निकायको शतप्रतिशत साथ रहने प्रतिवद्धता व्यक्त गर्नुभयो ।
