१८ साउन २०८१, शुक्रबार
कर्णाली प्रदेशका नवनियुक्त प्रदेश प्रमुख यज्ञराज जोशीले पदभार ग्रहण गर्नुभएको छ ।
बिहीबार राष्ट्रपति रामचन्द्र पौडेलसमक्ष पद तथा गोपनीयताको शपथ ग्रहण गरी आज सुर्खेत पुग्नुभएका जोशीले कर्णालीको चौथो प्रदेश प्रमुखका रुपमा पदभार ग्रहण गर्नुभएको हो । सरकारले यही साउन १४ गते कर्णाली प्रदेश प्रमुख तिलक परियारलाई हटाएर सुदूरपश्चिम प्रदेश कञ्चपुर जिल्ला निवासी यज्ञराज जोशीलाई प्रदेश प्रमुखमा सिफारिस गरेको थियो ।
विसं.२००६ साल चैत २५ गते बझाङको भातेखोलामा जन्मनुभएका जोशी हाल कञ्चनपुरको भीमदत्त नगरपालिका १८ कञ्चनपुरस्थित कटानमा बस्दै आउनुभएको छ । विसं.२०३२ सालमै उहाँको परिवार कञ्चनपुरमा बसाइँ सरेको थियो । ३० को दशकदेखि काँग्रेस राजनीतिमा सक्रिय हुँदै विसं.२०४८ सालको आठौँ महाधिवेशनबाट महासमिति सदस्य र ०६३ सालमा आएर कांग्रेसको कञ्चनपुर जिल्ला सभापति हुनुभएको थियो ।
