OnlinePana

आज : २०७९ माघ १८ गतेPreeti to UnicodeUnicode to PreetiRoman to UnicodeDate Converter
कोरपाटी संवाददातामाघ १०, २०७९सुर्खेत
३२ पटक

१० माघ २०७९, मंगलबार

कर्णाली तथा सुदूरपश्चिम प्रदेशका हिमाली जिल्लामा परेको हिमपातले यहाँको जनजीवन कष्टकर बनेको छ ।

कर्णाली प्रदेशको माथिल्लो क्षेत्रमा पर्ने कालीकोटको अग्लो भाग, जुम्ला, मुगु, हुम्ला र डोल्पामा भारी हिमपात भएको छ । त्यस्तै, सुदूरपश्चिम प्रदेशका बझाङ, बैतडी, र बाजुरामा पनि हिमपात भएको छ । हिमपातका कारण त्यहाँका स्थानीयको जनजीवन कष्टकर बन्दै गएको स्थानीयले जानकारी दिएका छन् ।

उच्च हिमाली जिल्लामा हिमपातका कारण सरकारी तथा गैरसरकारी कार्यालयका कामकाज पनि प्रभावित भएका छन् । हिमपात भइरहेपनि सबै सरकारी कार्यालय खुला रहेको जिल्ला प्रशासन कार्यालय जुम्लाका प्रमुख जिल्ला अधिकारी मुकेशकुमार केसरीले राससलाई जानकारी दिनुभयो ।

“नागरिकता बनाउन छिटपुटरुपमा सेवाग्रही आएकै छन् । चिसोबाट बच्न हामीले जुम्ला बजारका चोक चोक आगो बालेर ताप्ने व्यवस्था मिलाएका छौं,” उहाँले भन्नुभयो, “चिसोबाट बच्ने उपायहरुबारे पनि स्थानीयलाई सूचना गरिएको छ ।” हिउँ परिरहेकोले लामो तथा छोटो दूरीका सवारी यातायात सञ्चालनमा आउन नसकेको प्रजिअ केसरीले जनाउनुभयो ।

जिल्ला प्रशासन कार्यालय हुम्लाका निमित्त प्रमुख जिल्ला अधिकारी अमृतप्रसाद सुवेदीले भारी हिमपातका कठ्याङ्ग्रिने चिसो बढेको बताउनुभयो । “हुम्लाको आजको तापक्रम माइनस ५ डिग्री सेल्सियसमा झरेको छ । चिसो निकै बढेकोले हामी प्रशासनमा आगो बालेर बसेका छौं तर सेवाग्रही एकजना पनि आएका छैनन् ।” हिमपातकै कारण यातायातको एकमात्र विकल्प हवाई सेवा पनि ठप्प भएको निमित्त प्रजिअ सुवेदी जनाउनुभयो ।

चिसोले ज्येष्ठ नागरिक, दीर्घरोगी, बालबालिका र ट्युसन अध्ययन गर्ने बालबालिका प्रभावित भएका छन् । हिउँ पर्दा भने किसानहरु हर्षित भएका छन् । सुख्खा खडेरीले हिउँदे बाली सुक्दै जाँदा चिन्तित बनेका किसानहरु भने पहिलो पटक हिउँ परेपछि खुशी भएको कृषि विकास कार्यालय जुम्लाका प्रमुख गणेशबहादुर अधिकारी बताउनुभयो ।

हिउँदे बालीको उत्पादन वृद्धिका लागि कर्णालीमा पुस, माघमा हिमपात हुनुपर्ने यहाँका किसानहरु बताउँछन् । चन्दननाथ नगरपालिका ३ जुम्लाका मन्नु बुड्थापाले हिमपातले बढेको चिसोका कारण स्थानीयलाई हिँडडुल गर्न र पशु चौपायालाई दाना पानी दिन भने समस्या भएपनि अन्नबालीका लागि राम्रो भएको जानकारी दिनुभयो । हिमपातले गहुँ, जहुँ बाली सप्रिने र स्याउका बिरुवालाई फाइदा हुने बुड्थापाले बताउनुभयो ।

कर्णाली प्रदेश सरकारका आन्तरिक मामिला तथा कानून मन्त्रालय विपद् शाखाका प्रमुख कृष्णबहादुर रोकायले जल तथा मौसम विज्ञान विभागका अनुसार सुदूरपश्चिम, कर्णाली र गण्डकी प्रदेशका उच्च पहाडी तथा हिमाली भू–भागका केही स्थानहरुमा भोलिसम्म हिमपातको सम्भावना रहेको सूचना बमोजिम यहाँका नागरिकहरुलाई आवश्यक सावधानी तथा सतर्कता अपनाउन अनुरोध गरिएको बताउनुभयो ।

प्रतिकृया दिनुहोस्