२१ कात्तिक २०७९, सोमबार
नेपालस्थित युरोपियन युनियनको डेलिगेशनले पहिलो पटक सुर्खेतमा आयोजना गरेको ११औँ नेपाल–युरोपियन युनियन चलचित्र महोत्सव जारी रहेको छ ।
कात्तिक १९ गतेदेखि सुरु भएको महोत्सव वीरेन्द्रनगर कुइनेपानीस्थित मध्यपश्चिम विश्वविद्यालयको सेमिनार हलमा सञ्चालन भईरहेको छ । महोत्सवमा पाँच युरोपेली र तीन नेपाली चलचित्र दर्शक श्रोतालाई निशुल्क हेर्ने अवसर मिलाइएको नेपालका लागि युरोपेली युनियनको डेलिगेशनका प्रेस तथा सूचना अधिकारी अम्बर मैनालीले जानकारी दिनुभयो ।
“महोत्वस भौतिक र अनलाइन माध्यम गरी मिश्रित विधिबाट सञ्चालन गरिएको छ,” सूचना अधिकारी मैनालीले भन्नुभयो, “चलचित्रप्रति दर्शकको आकर्षण पनि बढेको र उत्साह पनि थपिएको पाएका छौं ।” असोज १९ गते अरस्टी रियाहीले निर्देशन गरेको ‘अस्कर एवं लिली’ फिल्म र २० गते लोरेन्ट मिचेली र ओस्कारले निर्देशन गरेको ‘लोला’ र किरण श्रेष्ठले निर्देशन गरेको ‘यट द अनदर विन्टर’ प्रदर्शन गरिएको उहाँले बताउनुभयो ।
उहाँका अनुसार आज द लिटिल कमरेड, ‘गड्स् अफ मोलेन्बेक’, लाहुरेनी गोर्खा गर्ल देखाइएको छ । भोलि कात्तिक २२ गते समापन सत्रमा मिसा क्याम्पद्वारा निर्देशन गरिएको रोमिज सलुन र सुजित बिडारीले निर्देशन गरेको नेपाली कथानक चलचित्र ‘ऐना भ्mयालको पुतली’ देखाइनेछ । ऐना झ्यालको पुतलीले हालैका दिनहरुमा थुप्रै प्रशंसा कमाएको छ ।
नेपालस्थित युरोपेली युनियनको डेलिगेशनकी कार्यवाहक प्रमुख डा.जोएले इभोनेटले काठमाडौंबाहिर सुर्खेतमा नेपाली चलचित्र प्रस्तुत गर्न पाउँदा उत्साही भएको प्रतिक्रिया दिनुभयो । उत्कृष्ट फिल्मको प्रदर्शनले आम कर्णालीबासी दशर्कका साथै फिल्मका विद्यार्थीका लागि उपयोगी हुने विश्वास डा.जोयलेले व्यक्त गर्नुभयो ।
मध्यपश्चिम विश्वविद्यालयका उपकुलपति प्राडा.नन्दबहादुर सिंहले युरोपियन युनियनसंग चलचित्र महोत्सवमा सहकार्य गर्न पाउँदा खुसी लागेको प्रतिक्रिया दिनुभयो । फिल्मबाट युरोप र नेपालको साँस्कृतिक र सामाजिक जीवनबारे थाहा पाउन एवं एक आपसको सम्बन्ध प्रगाढ बनाउन सहयोग पुगेको उहाँले बताउनुभयो । आगामी वर्ष कर्णालीको परिवेश समेटिएका वृत्तचित्र र फिल्मलाई पनि प्राथमिकतामा राख्न आयोजकलाई उपकुलपति प्राडा.सिंहले सुझाउनुभएको छ ।
चलचित्रकर्मी सुजित बिडारीले कर्णाली प्रदेशका चलचित्रका विद्यार्थी तथा चलचित्रकमीहरुलाई महोत्सव समापनको दिन मास्टरक्लास सञ्चालन गर्ने जनाइएो छ । आइतबार ‘लोला’ फिल्म हेरेपछि दर्शकले औधी मन छोएको प्रतिक्रिया दिए । दैलेखकी सुर्जा रावलले लोलाले फिल्मले आफ्नो मन छोएको प्रतिक्रिया दिनुभयो भने । सुर्खेत लेकवेशी नगरपालिकाका शेरबहादुर आचार्यले तेस्रो लिंगीको अन्तरआत्माको कथालाई समेटेको प्रस्तुति राम्रो लागेको जनाउनुभयो ।
