२६ पुस २०७८, सोमबार
कर्णाली प्रदेश सरकारका मुख्यमन्त्री जीवनबहादुर शाहीले कर्णालीपुत्री सुनमाया बुढाले विश्वमाझ नेपालको शिर उँचो बनाएको धारणा व्यक्त गर्नुभयो । बुढालाई आज कर्णाली प्रदेशमा गरिएको अभिनन्दन कार्यक्रमको क्रममा मुख्यमन्त्री शाहीले उच्च प्रशंसा गर्नुभएको हो ।
सन् २०२१ डिसेम्बर १२ मा थाइल्याण्डको उत्तरपश्चिममा पर्ने सबैभन्दा उच्च पर्वत डोर्ड इथानन्मा सम्पन्न ११० किलोमिटको अल्ट्रा ट्रेल रेसमा महिला प्रतियोगीहरुमा विश्वमा प्रथम आएर बुढाले कर्णाली र नेपालको नामको संसारभर चिनाएको भन्दै उहाँले खुशी व्यक्त गर्नुभयो । सुनमायाको सफलताले कणालीवासीको गर्वले छाती फुलेको उहाँको भनाई थियो । बुढाले दुई हजार प्रतियोगी सहभागी रहेको उक्त रेसमा महिलामा प्रथम र पुरुषसहितको दौडमा तृतीय स्थान प्राप्त गर्नुभएको थियो ।
“विश्वमा विकासमा सबैभन्दा पछि परेको देश नेपाल र नेपालमा अति नै पछि परेको कर्णालीले सुनमायाको जीतसँगै आज विश्वसामु आफ्नो इतिहास लेखाउन सफल भएको छ,” मुख्यमन्त्री शाहीले भन्नुभयो, “कर्णालीपुत्री बुढालाई हार्दिक बधाई छ । बुढाको सम्मानका लागि कर्णाली प्रदेश सरकारले रु.दुई लाख छुट्याएको छ ।” प्रदेश सरकारले खेल र खेलाडी प्रवद्र्धनमा जोड दिएको बताउनुभएका उहाँले नेपालमै भलिबल कभर्ड हलसहित सुर्खेतमा रु.एक अर्ब ७० करोडको अत्याधुनिक रंगशाला निर्माणको कार्य तीव्ररुपमा अगाडि बढाइएको जनाउनुभयो ।
कर्णाली प्रदेश खेलकुद परिषद्का उपाध्यक्ष प्रमोद हमालले विकट भूगोल सफलताको मानक बन्दो रहेछ भन्ने उदाहरण सुनमायाले देखाएको प्रतिक्रिया व्यक्त गर्नुभयो । जुम्ली छोरी बुढाको योगदानको उच्च मूल्याङ्कन स्थानीय, प्रदेशसहित नेपाल सरकारले गर्नुपर्नेमा उपाध्यक्ष हमालले जोड दिनुभयो ।
कर्णाली प्रदेशका सदस्य सचिव विश्वामित्र सञ्ज्यालले कर्णाली प्रदेश सान सुनमायाले नेपालको नाम उँचो राख्न सफल भएको बताउनुभयो । सदस्य सचिव सञ्ज्यालले मुख्यमन्त्री शाहीसमक्ष हरेक वर्षको ओलम्पिक दिवसमा ‘काक्रेबिहार अल्ट्रा ट्रेल रेस’ प्रतियोगिता सञ्चालन गर्ने प्रस्ताव राख्नुभयो । उहाँले भन्नुभयो, “कर्णाली क्षेत्र अल्ट्रा ट्रेल रेसको संभाव्य भूमि हो । यहाँको खेल क्षेत्रको विकास लागि प्रदेश सरकारले विशेष जोड दिनुपर्दछ ।”
उद्योग बाणिज्य संघ सुर्खेतका महासचिव लक्ष्मण कँडेलले सुनमायाको सफलताले नेपालको नाम विश्व इतिहासमा स्वर्णीम अक्षरले लेखिने बताउनुभयो । सुनमाया जस्ता हिराहरु जन्माउने कर्णाली कमजोरी नभएको जिकिर गर्दै महासचिव कँडेलले खेल क्षेत्रको विकास र खेलाडीहरुको प्रोत्साहनका लागि नीजि क्षेत्रबाट अपेक्षित सहयोग गर्ने प्रतिवद्धता गर्नुभयो ।
पातारासी गाउँपालिका २ जुम्ला पेरे गाउँ निवासी अल्ट्रा ट्रेल रेस विजेता २३ वर्षीय सुनमाया बुढाले जीवनका कठिन कर्मले मिठो फल मिल्ने अनुभूति व्यक्त गर्नुभयो । “गाह्रो काममा मात्र नाम छ,” बुढाले भन्नुभयो, “गाह्रो कामले सिकाउने र जिताउने दुवै गर्दो रहेछ ।” उहाँले स्वदेशी तथा विदेशी खेलाडीले प्रशिक्षण लिने खालको कर्णाली हाइअल्टिच्यूड ट्रेनिङ् सेन्टरको विकासमा जोड दिन मुख्यमन्त्री शाहीलाई आग्रह गर्नुभएको थियो ।
थाइल्याण्डमा सम्पन्न उक्त अल्ट्रा ट्रेल रेस प्रतियोगितामा बुढाले नर्थ फेस टिमबाट भाग लिनुभएको थियो ।
