२० बैशाख २०७८, सोमबार
नोबेल कोरोना भाइरस (कोभिड–१९) को संक्रमणबाट कर्णाली प्रदेशमा आज थप पाँजना कोरोना संक्रमतिहरुको मृत्यु भएको छ । हिजो तीनले ज्यान गुमाएका थिए ।
संक्रमणबाट ज्यान गुमाउनेमा सुर्खेत वीरेन्द्रनगर नगरपालिका १, २, १० का ५२, २६, ४० वर्षीय पुरुष र वडा नं.७ का ६३ वर्षीय महिला रहेको स्वास्थ्य सेवा निर्देशनालय कर्णाली प्रदेश सुर्खेतका निमित्त निर्देशक डा.रविन खड्काले जानकारी दिनुभयो । संक्रमित सबैको प्रदेश अस्पताल सुर्खेतमा उपचारको क्रममा मृत्यु भएको निमित्त निर्देशक डा.खड्काले बताउनुभयो ।
उहाँका अनुसार आजै दैलेख जिल्ला अस्पतालमा उपचाररत कोरोना संक्रमित ३५ वर्षीय एक पुरुषको मृत्यु भएको छ । आईतबार सुर्खेत सिम्ता गाउँपालिका ८ का ३०, लेकबेसी नगरपालिका ८ का ६८ र पञ्चपुरी नगरपालिका ११ का ३३ वर्षीय पुरुषको पनि प्रदेश अस्पतालमा उपचारको क्रममा मृत्यु भएको थियो ।
आज पाँच र आईतबार तीन जनाको मृत्यु भएसँगै कर्णालीमा कोरोना संक्रमणबाट मृत्यु हुनेको संख्या ५९ पुगेको छ । त्यस्तै, पछिल्लो २४ घण्टामा कर्णालीमा ५८१ जनाको आरटी पीसीआर परीक्षण गर्दा ३४७ (६० प्रतिशत) र ४४२ जनाको एन्टिजेन परीक्षण गर्दा १८० जना (४० प्रतिशत) मा कोरोना संक्रमण पुष्टि भएको निमित्त निर्देशक डा.खड्काले बताउनुभयो ।
त्यस्तै, यो प्रदेशमा हालसम्म कोरोना संक्रमण पुष्टि भएका नौ हजार १२८ संक्रमितहरु मध्ये पछिल्लो २४ घण्टामा ३१ जना डिस्चार्ज भएसँगै सात हजार ६२२ जना (८३ प्रतिशत) निको भएर घर फर्केका छन् । स्वास्थ्य निर्देशनलायका अनुसार दुई हजार १९४ जना संक्रमितहरु प्रदेशका विभिन्न आइसोलेशन रहेका छन् ।
