जुम्ला, २९ कार्तिक २०७७ शनिवार, जिल्ला प्रशासन कार्यालय जुम्ला तोडफोड गरिएको भन्दै नौ जना विरुद्ध सार्वजनिक मुद्दा लगाईएको छ ।
हिमा गाउँपालिका १ जुम्ला मोफ्ला गाउँका १६ वर्षीय किशोरी बबिता रोकायको हत्यामा संलग्नहरु लगायत शंकास्पदहरुको अनुसन्धान गर्नुपर्ने दबाब दिँदै आएका पीडित पक्ष र प्रहरी विच झडप हुदा जिल्ला प्रशासन कार्यालय तोडफोड भएको छ ।
शुक्रबार अपरान्ह प्रशासन कार्यालयमाथि अन्धाधुन्धा ढुंगामुढा गरेको र प्रशासनमाथि तोडफोड गर्ने नौजनालाई सार्वजनिक मुद्दा लगाईएको स्थानीय प्रशासनले जनाएको छ ।
मुद्दा लगाईएका नौ जनासहित स्थानीयहरुको ढुंगा प्रहारबाट प्रशासन कार्यालयको प्रजिअ कक्ष, निवास, प्रहरी विट र मालिका मन्दिर तोडफोड हुँदा रु.आठ लाख बराबरको क्षति भएको प्रमुख जिल्ला अधिकारी भूपेन्द्र थापाले जानकारी दिनुभयो ।
“पीडित पक्ष प्रशासन गेट अघि आएपछि हामीले नेतृत्व गरेर आएका व्यक्तिलगायत नौ जनालाई वार्ताका लागि भित्र बोलायौं,” प्रजिअ थापाले भन्नुभयो, “तर एकैछिन म लगायत जनपथ र सशस्त्रको डिएस्पीमाथि नै ढुंगा बर्साए । हामी बच्यौं तर ढुंगा प्रहारबाट एक जनपथ र तीन सशस्त्र प्रहरी घाईते भएका छन् ।”
घटनामा सुनियोजित भएको जनाउँदै उहाँले त्यसमा संलग्न नौ जनालाई सार्वजनिक मुद्दा लगाईएको बताउनुभयो । यता जिल्ला प्रहरी कार्यालय जुम्लाका प्रहरी निरीक्षक भरतसिंह राठौरले सार्वजनिक सम्पतिमाथि तोडफोड गरिएकोले सार्वजनिक अपराध अन्तरगतको मुद्दा चलाईएको जानकारी दिनुभयो । जसमा चार जना नियन्त्रण लिईएको र पाँच फरार रहेको प्रहरी निरीक्षक राठौरले बताउनुभयो ।
उहाँका अनुसार घाईते चार प्रहरीमा दुई सामान्य उपचारपछि घर फर्केको र दुई जनाको कर्णाली स्वास्थ्य विज्ञान प्रतिष्ठान जुम्लामा उपचार भईरहेको छ । यता पीडित पक्षका घाईते दुई जनापनि उपचारपछि घर फर्केको प्रहरीले जनाएको छ ।
घटनाका प्रमुख अभियुक्त करबहादुर भण्डारी, घटनामा आशंकित अभियूक्त रामचन्द्र डाँगी र उनको श्रीमतीलाई पीडितको किटानी जाहेरी अनुसार पक्राउ गरी अनुसन्धानका सबै प्रक्रिया पुर्याएर अदालत पठाई उनीहरुको सुनुवाई भईरहेको प्रहरीले जनाएको छ । यता पिडित पक्षले भने न्यायको पक्षमा बोल्दा उल्टै दुःख दिने प्रहरी प्रशासनको नियत रहेको आरोप लगाउदै आएका छन् ।
