२० असार २०८३, शनिबार
सुर्खेतः कर्णाली राजमार्गको दैलेख सडक खण्डमा दुर्घटनाग्रस्त फोर्स गाडीसहित कर्णाली नदीमा बेपत्ता यात्रुहरुको खोजी कार्यका लागि सशस्त्र प्रहरीको प्रविधियुक्त गोताखोर टोली परिचालन गरिएको छ ।
सुर्खेतबाट कालिकोटतर्फ जाँदै गरेको क.प्र. ०२–००१ ख १०५५ नम्बरको फोर्स गाडी असार १८ गते चामुण्डाबिन्द्रासैनी नगरपालिका ७ दैलेखको साङगेतडास्थित दुर्घटनाग्रस्त भई कर्णाली नदीमा खसेको थियो । घटनापश्चात् नेपाल प्रहरी, सशस्त्र प्रहरी बल तथा नेपाली सेनाको संयुक्त टोलीले दुई दिनसम्म खोजेर बेपत्ता गाडी तथा यात्रु भेटाउन नसकेपछि आज विपद् व्यवस्थापन तालिम शिक्षालय कुरिनटारबाट अत्याधुनिक उपकरणसहितको सशस्त्र प्रहरी निरीक्षक प्रेमबहादुर तामाङ नेतृत्वको पाँच जनाको गोताखोर टोली घटनास्थलमा परिचालन भएको कर्णाली प्रदेश प्रहरी कार्यालय सुर्खेत प्रमुख प्रहरी नायब महानिरीक्षक जयराज सापकोटाले पत्रकार भेटघाटमार्फत जानकारी दिनुभयो ।
“उक्त टोली पानीमुनि र भेलमा प्रयोग हुने सोनार क्यामेरा, म्याग्नेट (चुम्बक)सहित घटनास्थलको खोजी कार्यलाई तीव्र बनाईरहेको छ,” उहाँले भन्नुभयो, “हेलिकोप्टर र ड्रोन क्यामेराबाट पनि घटनास्थलका आसपासका कठिन ठाउँमा खोजतलासको काम भइरहेको छ । सशस्त्र प्रहरी बल नं.६ महेश्वरी बाहिनी मुख्यालयको ६ जनाको गोताखोर टोली पनि घटनास्थलमै छ ।” भौगोलिक कठिनाई, जल सतहको वृद्धि, तीव्र वेग र धमिलो पानीका कारण खोज तथा उद्धारको कार्य चुनौतिपूर्ण बनेको प्रहरी नायब महानिरीक्षक सापकोटाले बताउनुभयो ।
उहाँका अनुसार उक्त घटनामा परी पचालझरना ९ कालीकोट निवासी ५४ वर्षीय जेखे तिरुवाको मृत्यु भईसकेको छ । सोही पालिकाका मेखे तिरुवा, रास्कोट नगरपालिका २ खड्कागाउँका सिर्जना खड्का, पञ्चपुरी नगरपालिका ८ सुर्खेत माझीगाउँका चालक तुलाराम सुवेदी र सहचालक रामप्रसाद सुवेदीसहित फोर्स गाडी बेपत्ता रहेका छन् । नेपाल प्रहरी, सशस्त्र प्रहरी बल र नेपाली सेना गरेर करिब १०० जना जनशक्ति खोजी कार्यमा परिचालन भएको जनाईएको छ ।
