२४ जेठ २०७७, शनिबार
कर्णाली प्रदेशमा हालसम्म नोबेल कोरोना भाइरसको संक्रमणबाट तीन जनाको मृत्यु भएको छ ।
मृतकहरुमा दैलेख, सुर्खेत र डोल्पाका एक÷एक पुरुष व्यक्ति रहेका छन् । त्यसमा ३५ र २० वर्षीय दुई युवा रहेका छन् भने एक जना ५८ वर्षीय पुरुष रहनुभएको छ । कर्णालीमा कोरोना संक्रमणबाट मृत्यु हुने पहिलो व्यक्ति दुल्लु नगरपालिका–११ खागितडा दैलेख निवासी ३५ वर्षीय युवा थिए । उनको यही जेठ १७ गते शनिबारका दिन बिहान क्वारेन्टिनमै मृत्यु भएको थियो ।
त्यस्तै, दोस्रो व्यक्ति पञ्चपुरी नगरपािलका १ हाँसे सुर्खेतका २० वर्षीय युवाको जेठ २२ गते बिहीबारका दिन कोरोना संक्रमणबाट मृत्यु भएको थियो । उनलाई कोरोना संक्रमण नभएको भनेर घर पठाएपछि घरमै मृत्यु भएको थियो ।
कोरोनाकै संक्रमणकै कारण जगदुल्ला गाँउपालिका–३ डोल्पाका ५८ वर्षीय पुरुषको मृत्यु भएको पुष्टि गरिएको हो । कर्णाली स्वास्थ्य विज्ञान प्रतिष्ठान जुम्लाका अस्पताल निर्देशक डा.मंगल रावलले कोरोनाकै कारण उनको मृत्यु भएको जानकारी दिनुभयो । भौगोलिक विकटताका कारण मृत्युपछि २२ गते स्वाब संकलन गरी जुम्ला प्रतिष्ठान आरटी पिसिआर गर्दा कोरोना पुष्टि भएको निर्देशक डा.रावलले बताउनुभयो ।
सुर्खेतबाट यही जेठ १६ गते डोल्पा पुगेका उनलाई शुरुमा क्वारेन्टिनमा राखिएको थियो । लामो समयदेखि दमको रोगले पीडित उनलाई पछि होम क्वारेन्टिनमा राखिएको अवस्थामा यही जेठ २१ गते मृत्यु भएको थियो । कर्णालीमा मृत्यु हुने तीनै जनाको मृत्युपछि मात्र कोरोना पुष्टि भएको कर्णाली प्रदेश सरकार सामाजिक विकास मन्त्रालय स्वास्थ्य सेवा महाशाखा सुर्खेतले जनाएको छ ।
