१५ असोज २०८१, मंगलबार
कर्णाली प्रदेशसभाको चौथो अधिवेशन आज राति १२ः०० बजेबाट लागु हुने गरी अन्त्य भएको छ ।
कर्णाली प्रदेशसभाका सभामुख नन्दा गुरुङले नेपालको संविधानको धारा १८३ को उपधारा २ बमोजिम कर्णाली प्रदेशसभाको दोस्रो कार्यकालको चौथो अधिवेशनको राति १२ः०० बजे लागु हुने गरी प्रदेश प्रमुख यज्ञराज जोशीले अधिवेशन अन्त्य गर्नुभएको जानकारी दिनुभयो । सभामुख गुरुङले चालु अधिवेशनमा आजसम्म ३३ बैठक बसी ४६ घण्टा १५ मिनेट ब्यतित गरेको बताउनुभयो ।
अधिवेशन अन्त्यका लागि बसेको सभाको बैठकमा कर्णाली प्रदेशका मुख्यमन्त्री यामलला कँडेलले नीति तथा कार्यक्रम र बजेटको प्रभावकारी र समयमै कार्यान्वयन गर्न मातहतका निकाय र त्यहाँका प्रमुखहरुलाई निर्देशन दिएर सरकार अगाडि बढेको बताउनुभयो । बोलपत्र आह्वान गर्नुपर्ने योजनामा ५० प्रतिशत योजनाको बोलपत्र आह्वान भइसकेको बताउँदै उहाँले बिगतमा अधुरा रहेका वा बहुवर्षीय योजनाहरुको विषयमा निर्माण व्यवसायीहरुलाई राखेर प्रदेश सरकारले छलफल गरेको जनाउनुभयो ।
नेकपा माओवादी केन्द्र कर्णाली प्रदेशसभा दलका नेता राजकुमार शर्माले सरकारको नेतृत्वले हदैसम्मको पूर्वाग्रह राखेर अगाडि नबढ्न र छलकपट नगरी कर्णालीका जनताको हितमा काम गर्न सुझाउनुभयो । बैठकमा नेपाली काँग्रेस तथा नेकपा एमाले प्रदेशसभा दलका प्रमुख सचेतकद्वय हिक्मतबहादुर विष्ट र टेकराज पछाई, नेकपा एकीकृत समाजवादीका प्रदेशसभा सदस्य कल्याणी खड्कालगायतले धारणा राख्नुभएको थियो ।
