१६ असार २०७९, शुक्रबार
राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले मुलुक दुई तहको संघीय संरचनामा जानुपर्नेमा जोड दिनुभएको छ ।
राप्रपा नेपाल कर्णाली प्रदेश कार्य समितिद्वारा आज सुर्खेतमा आयोजित पत्रकार भेटघाट कार्यक्रममा बोल्दै अध्यक्ष थापाले प्रदेशबाहेक संघ र स्थानीय तहको संरचना मुलुकका लागि हितकर हुने बताउनुभयो । उहाँले भन्नुभयो, “विभिन्न सरकारमा नाम सत्तामा रहने दलहरुले ब्रम्हलुट गरिरहेका छन् । बाहिरिय दबाब र हस्तक्षेप लागु भएको हाम्रो देशको संघीयता निकै बोझिलो बन्दै गएको छ ।”
राप्रपामा लामो समय बसेर त्यसबाट किन अलग्निुभयो र संघीयता स्वीकार्य छ त भन्ने पत्रकारहरुको प्रश्नमा जवाफ दिँदै अध्यक्ष थापाले भन्नुभयो, “विसं.२०६३ सालदेखि १६ वर्षसम्म राजतन्त्रकै मुद्दा लिएर कठिन संघर्ष गरियो । तर राजतन्त्रको पुनःस्थापना हुने देखिएन र हामीले त्यो मुद्दा त्याग्यौं । अब सुशासनको माध्यमबाट हिन्दु राज्यको स्थापना गर्न लोकतन्त्र र हिन्दुराज्यको एजेण्डा अगाडि सारेका छौं ।”
उहाँले दुई तहको संघीयता स्वीकार गरिएको बताउनुभयो । सोही क्रममा अध्यक्ष थापाले धर्म परिवर्तनको महामारीले मुलुक खतरा अवस्थामा पुगेको भन्दै त्यसलाई रोक्न सरकारलाई उचित कदम चाल्न आग्रह गर्नुभयो । सनातन धर्मका नामा समाज रहेका रुढीवादी, परम्पागत गलत संस्कृतिलाई समाप्त पार्न राप्रपा नेपालले देशव्यापी अभियान थाल्ने उहाँको भनाई थियो ।
आर्थिक विप्रेषणबाट पालिएको देशको अवस्था कुनैपनि बेला संकटमा पर्न सक्ने औंल्याउनुभएका उहाँले मुलुकको नीतिगत र संरचनागत सुधार हुनुपर्ने, स्थिर राजनीतिका लागि पूर्ण समानुपातिक निर्वाचन प्रणाली हुनुपर्नेमा जोड दिनुभएको थियो ।
