११ असार २०७८, शुक्रबार
कर्णाली प्रदेश सरकारले पश्चिम सुर्खेतको सालकोट प्राथमिक स्वास्थ्य केन्द्रमार्फत ‘मोवाइल शिविर’ सञ्चालन गर्ने भएको छ ।
प्रदेश राजधानी सुर्खेत भएपनि स्वास्थ्य, शिक्षाका दृष्टिले पश्चिम सुर्खेत निकै पछाडि छ । सो क्षेत्रमा स्वास्थ्य सेवा दिने उद्देश्यले असार १५ गतेदेखि विशेषज्ञ सेवासहितको ‘मोबाइल शिविर’ सञ्चालन गरिने प्रदेश सरकारका सामाजिक विकासमन्त्री यज्ञबहादुर बुढाक्षेत्रीले जानकारी दिनुभयो ।
“पश्चिम सुर्खेतका नागरिकहरु सामान्य बिरामी हुँदा सदरमुकाम वीरेन्द्रनगर जानुपर्ने बाध्यता छ,” मन्त्री बुढाक्षेत्रीले भन्नुभयो, “त्यही बाध्यताबाट त्यहाँका नागरिकहरुलाई मुक्त गर्न घर आँगनमै सेवा दिने तयारी गर्दैछौं ।” वर्षाको समयमा असार र साउनमा दुई पटक कर्णाली प्रदेश अस्पतालका विशेषज्ञ चिकित्सकहरुले सेवा दिने प्रबन्ध मिलाईने उहाँले बताउनुभयो ।
सालकोट स्वास्थ्य चौकी चौकुने, बराहताल गाउँपालिकाका साथै पञ्चपुरी नगरपालिकाको केन्द्र भएको जनाउँदै भदौबाट भने साप्ताहिकरुपमा सेवा शुरु गरिने र सालकोटमा विशेषज्ञ सेवा हुँदा अछाम र कैलालीका नागरिकहरुले पनि सहज स्वास्थ्य सेवा पाउने उहाँले जनाउनुभयो ।
पश्चिम क्षेत्रका नागरिकहरुलाई बालरोग, स्त्रीरोग, नाक, कान र घाँटीलगायतका सेवाहरु प्रवाह गरेर सालकोटलाई पश्चिमको ‘स्वास्थ्य हव’का रुपमा विकास गर्ने उहाँको भनाई थियो । उहाँले भन्नुभयो, “विशेषज्ञ सेवाका लागि आवश्यक पर्ने स्वास्थ्य उपकरणहरु चालू आर्थिक वर्षभित्रै खरिद गर्दैछौ । भौतिक भौतिक पूर्वाधार निर्माण आगामी वर्षबाट शुरु गर्छौंं ।”
सामाजिक विकास मन्त्रालयका सचिव कृष्णप्रसाद काप्रीले पश्चिम सुर्खेतका नागरिकहरुमा स्वास्थ्य सेवाको पहुँच पु¥याउनका लागि सालकोट प्राथमिक स्वास्थ्य केन्द्रलाई मन्त्रालयले प्राथमिकतामा राखेको बताउनुभयो । उहाँले स्वास्थ्यको तल्लो इकाईबाट गुणस्तरीय स्वास्थ्य सेवा उपलब्ध गराउने नीति सरकारले लिएको जनाउनुभयो ।
प्राथमिक स्वास्थ्य केन्द्र सालकोटका प्रमुख डा.जीतेन्द्र यादवले सामान्य शल्यक्रिया हुन नसक्दा गरिब जनताहरु सदरमुकाम वीरेन्द्रनगर र देशका अन्य स्वास्थ्य संस्थामा पुग्नुपर्ने समस्या भएको बताउनुभयो । १५ शैय्याको अस्पतालको रुपमा स्तरवृद्धि भएपनि जनशक्ति र स्वास्थ्य उपकरण अभावले आवश्यक सेवा दिन नसकिएको उहाँको भनाई थियो । प्रमुख यादवका अनुसार शव परीक्षणका लागि अहिले पनि वीरेन्द्रनगर जानुपर्ने बाध्यता रहेको छ ।
