Skip Add

OnlinePana

कोरपाटी संवाददातामंसिर २८, २०७७सुर्खेत
१६२ पटक

२८ मंसिर २०७७, आईतबार

नेपाल सरकारले विद्यालय खोल्न अनुमति दिएसँगै यही मंसिर पहिलो सातादेखि कर्णालीमा पनि धमाधम विद्यालय खोलिए । नौ महिनापछि खोलिएका विद्यालय तीन सातासम्म राम्रैसँग सञ्चालनमा आए । विद्यालय खोलिएको एक महिना नपुग्दै भने शिक्षक र विद्यार्थीमा कोरोना संक्रमण देखिन थालेपछि अहिले पुनः बन्द हुन थालेका छन् ।

कर्णाली प्रदेश अस्पताल÷पशुपन्छी रोग अन्वेषण प्रयोगशाला सुर्खेतमा गरिएको परीक्षणमा आज एकैदिन १७ जना शिक्षकमा कोरोना संक्रमण पुष्टि भएपछि विद्यालयहरु बन्द हुने अवस्था आएका हुन् । कोरोनाको पीसीआर रिपोर्ट अनुसार आज एक विद्यालयका ११ सहित सुर्खेतमा जिल्लामा १७ जना शिक्षकमा कोरोना संक्रमण देखिँदा विद्यालय बन्द हुन गएको जनस्वास्थ्य सेवा कार्यालय सुर्खेतका प्रमुख चेतननिधि वाग्लेले जानकारी दिनुभयो ।

प्रमुख वाग्लेका अनुसार आज प्राप्त रिपोर्टमा सुर्खेत जिल्लाका १७ जना शिक्षकलाई लक्षणसहितको संक्रमण देखिएको छ । उहाँहरु घरमै आइसोलेशनमा बस्नु भएको छ र सबैको अवस्था सामान्य नै छ । चार जना विद्यार्थीमा समेत कोरोना संक्रमण पुष्टि भएको उहाँले बताउनुभयो ।

कोरोना संक्रमण पुष्टि भएकाहरुमा सुर्खेत पञ्चपुरी नगरपालिकाको सुर्यप्रकाश माद्यामिक विद्यालय पलैटेका ११ जना शिक्षक रहेको उक्त नगरपालिकाका नगर स्वास्थ्य शाखा प्रमुख गंगादेव पुरीले बताउनुभयो । त्यस्तै, सोही नगरपालिकाको विद्याज्योती माद्यामिक विद्यालय बाबियाचौरका दुईजना शिक्षकलाई पनि संक्रमण देखिएको जनाईएको छ ।
दुई विद्यालयका ३९ जना शिक्षकको पीसीआर परिक्षण गर्दा १३ जना शिक्षकको रिपोर्ट पोजेटिभ आएको उहाँले जनाउनुभयो । उहाँका अनुसार कोरोना संक्रमण देखिएका शिक्षकहरुको लक्षण कोरोनासँग मिलेको देखिएपछि उनीहरुको पीसीआर परिक्षण गरिएको थियो ।

त्यसैगरी, गुर्भाकोट नगरपालिका सुर्खेतको नेपाल राष्ट्रिय माध्यामिक विद्यालयका दुईजना र जनसेवा आधारभुत विद्यालयका एकजना शिक्षकमा पनि कोरोना संक्रमण देखिएको नगरपालिकाका नगर शिक्षा प्रमुख पदम विकले जनाउनुभयो । शिक्षकमा कोरोना देखिएकोले विद्यालय बन्द गरिएको नगर शिक्षा प्रमुख विकले बताउनुभयो ।

पञ्चपुरी नगरपालिकाले शिक्षकहरुमा कोरोना संक्रमण नेगेटिभ नआउञ्जेलसम्मका लागि एकसाता बन्द भएको बताएको छ । संक्रमित शिक्षकहरुको कन्ट्याक्ट ट्रेसिङ गरेर रिपोर्ट आएपछि विद्यालय खोल्ने वा नखोल्नेपछि निर्णय गरिने कोरोना प्रभावित नगरपालिकाहरुले जानकारी दिएका छन् ।

एक महिना अघि हुम्ला नाम्खा र ताजाकोट गाउँपालिकाका विद्यालयमा शिक्षक विद्यार्थीमा कोरोना संक्रमण देखिँदा अहिले हुम्लाका विद्यालयहरु बन्द भएको र माघ १५ पछि मात्र खोल्ने शिक्षा विकास तथा समन्वय एकाई हुम्लाका प्रमुख विष्णुबहादुर शाहीले जानकारी दिनुभएको छ ।

यता सामाजिक विकास मन्त्रालयका जनस्वास्थ्य शिक्षा शाखाका स्वास्थ्य शिक्षा अधिकृत नवराज कँडेलले आज १७ शिक्षक, पाँच स्वास्थ्यकर्मी, चार विद्यार्थीसहित ४४ जनामा कोरोना संक्रमण पुष्टि भएको बताउनुभयो । ४४ थपिएसँगै कर्णालीमा कोरोना संक्रमितको संख्या सात हजार १०६ जना पुगेको स्वास्थ्य शिक्षा अधिकृत कँडेलले जनाउनुभयो ।

उहाँका अनुसार आजै २५ जनाले कोरोना संक्रमण जितेर घर फर्केका छन् । यससँगै कोरोना जितेर घर फर्कनेको संख्या कर्णालीमा छ हजार ६३२ पुगेको ३१३ जना संक्रमितहरु आइसोलेसनमा रहेको कर्णाली प्रदेश सामाजिक विकास मन्त्रालय, जनस्वास्थ्य शिक्षा शाखाले जानकारी दिएको छ ।

प्रतिकृया दिनुहोस्