८६ थपिएसँगै संक्रमितको संख्या तीन हजार ७२९ पुग्यो
१६ असोज २०७७, शुक्रबार
पछिल्लो समयमा कर्णालीमा कोरोना संक्रमण बढ्न थालेको छ । यद्यपि सरकारी कार्यालयदेखि बाटोघाटो, चियापसल, धारा पँधेरा र सडकलगायत जताततै मान्छेको भिड पनि त्यत्तिकै बढेको देखिन्छ ।
शुरु शुरुमा जस्तो अहिले सावधानी कोही कसैले अपनाएको देखिदैन । जसको कारण आजको दिनमा मात्रै कर्णाली प्रदेशमा थप ८६ जनामा कोरोना संक्रमण देखिएको छ । कर्णाली प्रदेश अस्पताल तथा पशुपंन्छी रोग अन्वेषण प्रयोगशालामा गरिएको आरटी पीसीआर परीक्षणमा ७७ र कर्णाली स्वास्थ्य विज्ञान प्रतिष्ठान जुम्ला भएको परीक्षणमा नौ व्यक्ति गरी ८६ जनामा कोरोना पुष्टि भएको सामाजिक विकास मन्त्रालय स्वास्थ्य शिक्षा शाखाका स्वास्थ्य शिक्षा अधिकृत नवराज कँडेलले जानकारी दिनुभयो ।
“हिँजो पनि कर्णालीमा १०५ जनामा कोरोना संक्रमण देखिएको थियो,” स्वास्थ्य शिक्षा अधिकृत कँडेलले भन्नुभयो, “आज पुनः ८६ जना थपिएसँगै कर्णालीमा कोरोना भाइरसबाट संक्रमित हुनेको संख्या तीन हजार ७२९ पुगेको छ ।” संक्रमितहरुमा सुर्खेतका ५३, जुम्लाका सात, दैलेखका छ, कालीकोटका चार, जाजरकोटका दुई र अन्य प्रदेशका १४ व्यक्ति रहेको उहाँले बताउनुभयो ।
अधिकृत कँडेलका अनुसार पछिल्लो २४ घण्टामा कोरोना संक्रमण पुष्टि हुनेहरुमा कन्ट्याक्ट ट्रेसिङमा परेका १९, स्वास्थ्यकर्मी १२, कर्मचारी आठ, क्वारेन्टाइनमा रहेका छ, सशस्त्र प्रहरी पाँच, एयरलाइन्स कर्मचारी चार, प्रहरी तीन, बिरामी र शिक्षक दुई÷दुई जना व्यक्ति रहेका छन् । त्यस्तै, इन्जिनियर, थुनुवा, अटोचालक, कृषकहरुमा पनि संक्रमण देखिएको छ ।
हाल कर्णालीमा सक्रिय कोरोना संक्रमितको संख्या ४९२ रहेको जनाउँदै उहाँले आज तीन जना डिस्चार्ज भएका छन् । कर्णालीमा कोरोना जितेर घर फिर्ता हुनेको संख्या तीन हजार ४५ पुगेको छ । कोरोना महामारीविरुद्ध सरकारले जारी गरेका आवश्यक नीति, नियम, निर्देशन तथा मापदण्डको पालना नगर्दा पछिल्लो समयमा कर्णालीमा संक्रमणले सबै क्षेत्र प्रभावित भएको छ ।
