१६ जेठ २०८३, शनिबार
सुर्खेतः कर्णाली प्रदेशका प्रदेश प्रमुख यज्ञराज जोशीले पछिल्लो समयमा कर्णालीका छोरीहरु हरेक क्षेत्रमा सक्षम र प्रतिभावान बन्दै गएको बताउनुभएको छ ।
ज्योति फाउण्डेसनद्वारा सुर्खेत वीरेन्द्रनगरमा आयोजित ‘कर्णाली छोरी सम्मेलन–२०८३’ दोस्रो संस्करण कार्यक्रमको उद्घाटन कार्यक्रमलाई सम्बोधन गर्दै प्रदेश प्रमुख जोशीले राजनीतिक तथा प्रशासनिक क्षेत्रको नेतृत्व तहमा समेत कर्णालीका छोरीहरु पुगेको बताउनुभएको हो । त्यति हुँदाहुँदै अहिले पनि कर्णालीका ३३ प्रतिशत महिला अझै पनि निरक्षर रहेको जनाउँदै उहाँले तिनलाई साक्षर बनाउन तीनै तहका सरकारले विशेष ध्यान दिनु आग्रह गर्नुभयो ।
कर्णालीलाई पिछडिएको क्षेत्रको रुपमा मात्र हेर्न नहुने भन्दै उहाँले भन्नुभयो, कर्णालीका महिलाहरु पनि हरेक क्षेत्रमा क्रियाशील छन् यद्यपि साक्षर हुन बाँकी रहेका ती महिलाहरुलाई सबल बनाउनुपर्छ । प्रदेश प्रमुख जोशीले कला, संस्कृति र सभ्यताको साथै नेपालका आधाभन्दा बढी जातिको उद्गम थलो कर्णालीलाई सबै नेपालीले सम्मान गर्नुपर्ने धारणा व्यक्त गर्नुभयो ।
राजनीतिक र प्रशासनिक पहुँचका विषयमा चर्चा गर्दै उहाँले अब महिलाहरु समानुपातिक कोटा छोडेर प्रत्यक्ष निर्वाचनतर्फ मुखरित हुन र संविधान संशोधनको बहस चलिरहेका बेला ३३ प्रतिशतबाट ५० प्रतिशत हिस्सा माग गर्न र दबाब दिनसमेत आग्रह गर्नुभयो । कर्णाली प्रदेशका पूर्वमुख्यमन्त्री जीवनबहादुर शाहीले समाजमा महिलाहरूको उपस्थिति र भूमिकामा ठूलो परिवर्तन आएतापनि राज्यको नीतिगत तहमा पुग्न कर्णालीका छोरीहरुको सशक्तिकरणमा थप मेहनत गर्नुपर्नेमा जोड दिनुभयो ।
कर्मचारी प्रशासन, प्रहरीदेखि राज्यका उच्च निकायमा महिलाहरूको नेतृत्व स्थापित हुनुले ठूलो अर्थ राख्ने भन्दै उहाँले हिजो स्कुल पढ्न नपाउने अवस्थाका कर्णालीका छोरीहरु आज विद्यालय जाने संख्यामा उल्लेख्य प्रगति भएको बताउनुभयो । प्रदेश सरकारले छोरीको सुरक्षा र सशक्तिकरणका लागि ‘बैंक खाता छोरीको, सुरक्षा जीवनभरिको’ जस्ता महत्वपूर्ण कार्यक्रम ल्याएको तथापि त्यसको प्रभावकारी कार्यान्वयन नहुनु दुःखद् भएको बताउनुभयो ।
नेकपा कर्णाली प्रदेशसभा दलका नेता मंगलबहादुर शाहीले कर्णाली छोरी सम्मेलन महिला सशक्तिकरण र नेतृत्व विकासको उत्तम कार्य भएको बताउनुभयो । छोरीहरुको मर्यादित जीवन, उनीहरुप्रति गरिने सम्मानित व्यवहारले समुन्नत, शान्त तथा संस्कारयुक्त समाज निर्माण हुने नेता शाहीको भनाई थियो ।
नेकपा एमाले कर्णाली प्रदेशसभा दलको तर्फ प्रदेशसभा सदस्य जीतबहादुर मल्लले मुलुक समृद्ध बन्न कर्णालीको विकास हुनुपर्ने र सभ्य तथा संस्कारयुक्त समाज निर्माणका लागि छोरी सशक्त बनाउनुपर्ने धारण व्यक्त गर्नुभयो । नीतिगत तथा नेतृत्व तहमा पुग्न कर्णालीका छोरीहरुले मुलुकका अन्य प्रदेश भन्दा बढी संघर्ष गर्नुपरेको तथापि कमजोर भएर बस्नुपर्ने अवस्था नरहेको उहाँको भनाई थियो ।
वीरेन्द्रनगर नगरपालिकाका प्रमुख मोहनमाया ढकालले पतिसँगै सतिजाने देशका हामी छोरीले अत्यास लाग्दा कालखण्ड काटेर आजको अवस्थामा आउन धेरै ठूलो त्याग, संघर्ष र बलिदान गर्नुपरेको बताउनुभयो । उहाँका अनुसार दुई दिनसम्म सञ्चालन हुने यो छोरी सम्मेलनले कर्णालीका छोरीहरु पनि अब यो देशको नेतृत्व गर्न सक्छन् भन्ने सन्देश प्रवाह गरेको छ ।
