२८ जेठ २०७७, बुधबार
कर्णालीमा आज थप ३७ जना कोरोना संक्रमित थपिएका छन् । ३७ जना नयाँ संक्रमित थपिएसँग कर्णालीमा कोरोना संक्रमित हुनेको संख्या ७०८ पुगेको छ ।
कर्णाली प्रदेश अस्पताल तथा पशुपंक्षी रोग अन्वेषण प्रयोगशाला सुर्खेतमा गरिएको आरटी पिसिआर परीक्षणमा दैलेखका २५, सुर्खेतका नौ र जाजरकोटका तीन जनामा कोरोना संक्रमण पुष्टि भएको कर्णाली प्रदेश सामाजिक विकास मन्त्रालय स्वास्थ्य सेवा महाशाखमा प्रमुख डा.लक्ष्मीनारयाण तिवारीले जानकारी दिनुभयो ।
महाशाखा प्रमुख डा. तिवारीका अनुसार दैलेख डुंगेश्वर गाउँपालिका २३, अवलपराजुलका दुई जनामा संक्रमण पुष्टि भएको छ । त्यस्तै सुर्खेत गुर्भाकोट नगरपालिकाका सात, बराहताल गाउँपालिकाका एक र सिम्ता गाउँपालिकाका एक जनामा कोरोना संक्रमण पुष्टि भएको उहाँले बताउनुभयो । त्यसैगरी, जाजरकोट छेडागाड नगरपालिकाका दुई र शिवालय गाउँपालिकाका एक जनामा कोरोना संक्रमण देखिएको स्वास्थ्य सेवा महाशाखाले जनाएको छ ।
