१४ कात्तिक २०८२, शुक्रबार
सुर्खेतः कर्णाली प्रदेश सरकारका मुख्यमन्त्री यामलाल कँडेलले कोहलपुर–सुर्खेत १३२ केभी प्रसारण लाइनको स्थलगत अनुगमन गर्नुभएको छ ।
उहाँले आज आयोजना निर्माणस्थल हर्रे र बबई क्षेत्र पुगेर कार्य प्रगतिको अनुगमन गर्नुभएको हो । यसअघि उक्त आयोजनाको काम ९० प्रतिशत सकिएको र बाँकी असोज महिनामै सम्पन्न हुने भनिएपनि निर्माण कार्यमा ढिलाई भएपछि अवस्था जानकारी लिन स्थलगत अनुगमन गरिएको मुख्यमन्त्री कँडेलले बताउनुभयो ।
उहाँका अनुसार निर्माण सम्पन्न हुने कार्य ढिला भएपछि आगामी कात्तिक महिनाभित्र सुर्खेत सुब्बाकुना सवस्टेशनमा बिद्युत् चार्ज गर्ने लक्ष्य पुरा नहुने देखिएको छ । अवलोकनको क्रममा मुख्यमन्त्री कँडेलले आयोजना निर्माणमा देखिएको समस्या समाधान गर्न थप सहजीकरण गर्न आफू निरन्तर प्रयासमा रहने बताउनुभएको छ ।
पछिल्लो जेनजी आन्दोलन र दशैंतिहार लगायतका चाडपर्वका कारण निर्माण कार्यमा केही ढिलाइ भएको आयोजनामा कार्यरत कर्मचारीहरुले जानकारी दिएको उहाँले बताउनुभयो । कोहलपुर–सुर्खेत १३२ केभी प्रसारण लाइनको काम लामो समयदेखि सम्पन्न नहुँदा दैनिकरुपमा बिद्युत पटक पटक जाने समस्याबाट यहाँका नागरिकहरुले सास्ती खेप्दै आएका छन् ।
