१२ जेठ २०८२, सोमबार
कर्णाली सरकारका मुख्यमन्त्री यामलाल कँडेलले पर्यटकीय महत्व बोकेको छेडा–गढी–लेकगाउँ–कल्याणकाँध सडक स्तरोन्नति कार्यको शिलान्यास गर्नुभएको छ ।
वीरेन्द्रनगर नगरपालिका १४ देखि बराहताल गाउँपालिकाको कल्याणकाध जोड्ने सात किलोमिटर सडकको स्तरोन्नति कार्यका लागि आज मुख्यमन्त्री कँडेलले शिलान्यास गर्नुभएको हो । सडक स्तरोन्नति कार्यको सिलन्यास गर्दै मुख्यमन्त्री कँडेलले विकासका कार्यहरु भईरहँदा कर्मचारी र सरकारको भर नपरी यसमा सबैले साथ सहयोग दिनुपर्ने बताउनुभयो ।
उहाँले भन्नुभयो, “शिलान्यास गर्नका लागि आउने भन्दा पनि यो आयोजना निर्माणका विषयमा सबैलाई जानकारी दिनु मुख्य ध्येय हो । समुदायले विकास मेरा लागि हो भन्ने सम्झनुपर्दछ । प्रदेश सरकार यहाँहरुका पूर्वाधारका आवश्यकता परिपूर्ति गर्न निर्वाध अगाडि बढेको छ । विकास जनप्रतिनिधि र कर्मचारीले गर्ने नभई हामी सबैको हो तर भूमिका फरक छ भन्ने बुझिदिन आग्रह गर्दछु ।”
यही वर्ष सडक निर्माण कार्य सम्पन्न नहुने भन्दै उहाँले हरेकको अवस्था बदल्न विकास अपरिहार्य शर्त भएको त्यसमा सबैको साझा सरोकार हुनुपर्ने धारणा राख्नुभयो । ऐतिहासिक तथा पुरातात्विक महत्व बोकको गढीदेखि कल्याणकाँधसम्म निर्माण हुने सात किलोमिटर सडकले यहाँका स्थानीयहरुको दैनिकीमा सहजता ल्याउने मुख्यमन्त्री कँडेलको भनाई थियो ।
पूर्वाधार विकास निर्देशनालय सुर्खेतका निर्देशक सूर्यबहादुर शाहीले करिब रु.आठ करोडमा निर्माण हुने उक्त सडक तीन हजार पाँच सय मिटर पक्की र त्यही दूरीमा ग्राभेल सडक निर्माण हुने जानकारी दिनुभयो । उहाँका अनुसार यही बैशाख २२ गते सम्झौता भएर उक्त सडक निर्माणको जिम्मा बि.आई.एस. कन्स्ट्रक्सन प्रा.लि. काभ्रेपलाञ्चोकले लिएको छ । सडक निर्माणको अवधि विसं.२०८३ असार मसान्तसम्म रहेको निर्देशक शाहीले बताउनुभयो ।
प्रालिका प्रतिनिधि अमृत गौतमले कम्पनीले भोलिदेखि कायसम्पादनमा तीव्रता ल्याउने बताउनुभयो । स्थानीयस्तरबाट आउने बाधा अवरोध नआएमा तोकिएको अवधिमा आयोजना सम्पन्न हुने उहाँको भनाई थियो ।
