७ फागुन २०८१, बुधबार
कर्णाली प्रदेश सरकारका मुख्यमन्त्री यामलाल कँडेलले नेपालको संविधान २०७२ को महत्वपूर्ण जग प्रजातन्त्र भएको जनाउनुभएको छ ।
७५औं प्रजातन्त्र स्थापना दिवसको अवसरमा सम्पूर्ण नेपाली आमाबुबा दाजुभाई दिदीबहिनीहरुलाई शुभकामना दिनुहुँदै मुख्यमन्त्री कँडेलले प्रजातन्त्र स्थापनाका लागि भएका संघर्षको मार्गदर्शनस्वरुप नेपालको वर्तमान संविधानले संघीय लोकतान्त्रिक गणतन्त्रात्मक व्यवस्थालाई अङ्गीकार गर्दै न्याय र समानतामा आधारित समाजवाद उन्मुख अर्थतन्त्र निर्माण गर्ने लक्ष्य लिएको बताउनुभएको हो ।
उहाँले आजको नेपाली जनताको लामो त्याग, बलिदान र समर्पणबाट मुलुकमा प्रजातन्त्रको प्रादुर्भाव भएको बताउनुभयो । आज एक शुभकामना सन्देश जारी गर्दै उहाँले भन्नुभएको छ, “नेपालको इतिहासमा आजको दिन गौरवपूर्ण छ । यसले हामी सबैलाई लोकतान्त्रिक मूल्य, मान्यताहरु अवलम्वन गर्दै जनताका आशा अपेक्षाहरु पूरा गर्नेतर्फ अगाडि बढ्न प्रेरित गर्नेछ भन्ने विश्वास लिएको छु ।”
त्यसैगरी उहाँले राज्य शक्तिको स्रोत जनता मात्र भएकोले मुलुकको सार्वभौमसत्ता जनतामा निहित हुनुपर्ने बताउनुभएको छ । लामो संघर्ष र बलिदानबाट प्राप्त संघीय लोकतान्त्रिक गणतन्त्रको स्थापना र जनता आफैले संविधान बनाएको बताउँदै वर्तमान संविधान निर्माणको एउटा महत्त्वपूर्ण जग विसं.२००७ सालको क्रान्ति थियो भन्ने हामीले बिर्सन नहुने जनाउनुभएको छ ।
नेपाली जनताको सात दशक लामो त्याग र बलिदानबाट प्राप्त संविधानले लिएको यो लक्ष्य जनस्तरमा परिवर्तनको महसुस गराउन सकेमात्र यो व्यवस्था दिगो हुने बताउँदै राष्ट्रिय प्रजातन्त्र दिवसले दिगो शान्ति, सुशासन, विकास र समृद्धिको राष्ट्रिय संकल्प हासिल गर्न सबैमा प्रेरणा प्रदान गरोस् भन्ने कामना मुख्यमन्त्री कँडेलले गर्नुभएको छ ।
