२७ कार्तिक २०८१, मंगलबार
कर्णाली प्रदेश सरकारका मुख्यमन्त्री यामलाल कँडेलले सार्वजनिक सेवालाई प्रभावकारी बनाउन लागि परेको बताउनुभएको छ ।
प्रदेश सरकारका योजनाहरुको प्रभावकारी कार्यान्वयनका विषयमा दैलेखका जनप्रतिनिधि र कर्मचारीहरुसँग छलफल गर्न आज दैलेख पुग्नुभएका मुख्यमन्त्री कँडेलले पत्रकारहरुसँगको भेटघाटको क्रममा सेवा प्रवाह पारदर्शी, छरितो र प्रभावकारी हुन सकेमात्र नागरिकलाई सरकार, राज्य छ भन्ने अनुभूति हुने बताउनुभयो । सुरक्षित यातायातमा जनचेतनाको अभाव भएका कारण यतिबेला कर्णालीमा सवारी दुर्घटनाबाट जनधनको ठूलो क्षति भएको बताउनुभएका उहाँले यसको सुधार गर्न समाजको चेतनास्तर माथि उठाउनुपर्ने आवश्यक रहेको जनाउनुभयो ।
आगामी वर्षबाट विधिसम्मत योजना निर्माण, त्यसको प्रभावकारी कार्यान्वयन र पारदर्शिता एवं संघीय सरकारलाई अनुभूति गराउने मूलभूत योजना निर्माण गर्ने, अलपत्र योजनालाई समय सम्पन्न गर्ने आधारबाट अगाडि बढ्ने मुख्यमन्त्री कँडेलको भनाई थियो । जनअपेक्षा अनुसार कतिपय काम गर्न नसकिएको स्वीकार्दै उहाँले सामाजिक सञ्जालमा आएका कुराबाट धारणा बनाउनु सकरात्मक नहुने बताउनुभयो ।
उहाँले भन्नुभयो, “मैले मेरो दायित्व पुरा गर्नुपर्छ । यसमा गुनज्यास लिने भन्ने छैन । सेवा प्रदायकहरुले अतिरिक्त शुल्क नलिइकन काम गर्नुस् भन्छु । सकरात्मक काममा सबैले आ–आफ्नो ठाउँबाट सहयोग गरौं । विकास निर्माण र समृद्धिको अभियानमा नागरिकदेखि नीतिगत तहसम्मको ऐक्यवद्धता आवश्यक छ ।”
पेट्रोलियम पदार्थ उत्खनन् गर्दै गरेको महत्वपूर्ण ठाउँ दैलेख हो भन्दै अहिले नै भण्डारण तथा प्रशोसनको तहमा गइहाल्नु जरुरी नरहेकोले हामीले गरेको अनुमान अनुसार भए दैलेखसहित सिंगो कर्णालीको अर्थतन्त्र र विकासमा ठूलो टेवा पुग्ने उहाँले बताउनुभयो । मुख्यमन्त्री कँडेलका अनुसार यसले धार्मिक, कृषि क्षेत्रका साथै रोजगारमा ठूलो सहयोग पुग्ने देखिन्छ ।
भौतिकका साथै मानवीय सेवाका विकास हुनुपर्नेमा जोड दिनुभएका उहाँले पत्रकारहरुका लागि विद्युतीय उपकरण, लोक कल्याणकारी विज्ञापन, पुरस्कार वितरणका विषयमा समेत प्रदेश सरकारको ध्यान दिएको प्रतिक्रिया दिनुभयो ।
