१४ चैत २०७८, सोमबार
ऐतिहासिक पुरातात्विक महत्वको क्षेत्र काक्रेबिहारको संरक्षणका लागि रु.छ लाखको अस्थायी प्रहरी विट निर्माण गरिएको छ ।
कर्णाली प्रदेशको राजधानी शहरमा अवस्थित वीरेन्द्रनगर नगरपालिकाको ९ सुर्खेतको वडा कार्यालयले रु.छ लाख ५० हजारमा अस्थायी प्रहरी विटको भवन निर्माण गरेको हो । सुर्खेतको प्रमुख पर्यटकीय क्षेत्र मानिने काक्रेबिहारस्थित बनेको उक्त भवनको उद्घाटन नगरप्रमुख देवकुमार सुवेदी उपप्रमुख मोहनमाया ढकाल र जिल्ला प्रहरी कार्यालय सुर्खेतका प्रमुख प्रहरी उपरीक्षक पदमबहादुर विष्टले संयुक्त रुपमा उद्घाटन गर्नुभएको हो ।
विसं.२०७६ भाद्र २५ गतेबाट सञ्चालनमा रहेको अस्थायी प्रहरी विटले आजबाट आफ्नै पक्की भवनबाट कार्य सञ्चालन गरेको छ । नवनिर्मित भवन उद्घाटनमा बोल्दै नगरप्रमुख सुवेदी देशकै महत्वको ऐतिहासिक क्षेत्र काँक्रेविहार संरक्षणमा प्रहरीसहित स्थानीय समुदायको पनि सहयोग आवश्यक हुने बताउनुभयो । आर्थिक विकासका हिसाबको आधारशीला मानिने काक्रेबिहार सबैको साझा सम्पति भएको उहाँको भनाई थियो ।
त्यस्तै, उपप्रमुख मोहनमाया ढकालले बढ्दो जनसंख्यासँगै राज्यसँग सुरक्षा चुनौती भएकोले जनतासँग प्रहरी छ भन्ने अनुभुति दिएर काम गर्न प्रहरीले सुझाउनुभयो । ९ नम्बर वडाअध्यक्ष सुरेश मानन्धरले वडामा काँक्रेविहारको मुल गेटसँगै प्रहरी विटको भवन निर्माण गरेको बताउनुभयो । उहाँले भन्नुभयो “यो प्रहरी विटले ९ नम्बर मात्र नभएर २ र १० नम्बर वडाको पनि केही क्षेत्र हेरिरहेको छ । यस क्षेत्रमा लागुऔधष नियन्त्रण गर्न प्रहरी र जनता उतिकै लाग्नुपर्छ ।“
उक्त कार्यक्रममा स्थानीय समाजसेवी डम्मरविक्रम जिसी, गणेश वली, कर्णाली प्रदेश सरकारका पूर्वमुख्य न्यायधिवक्ता विद्याभूषण मानन्धर वडा सदस्यद्वय जीवनकुमार शर्मा, टिका विक र राधा विक लगायतको उपस्थिति रहेको थियो ।
