१४ चैत २०७७, शनिबार
कर्णाली प्रदेश सरकारका भूमि व्यवस्था, कृषि तथा सहकारीमन्त्री बिमला केसीले सहकारीहरु सामाजिक तथा साँस्कृतिक रुपान्तरणको अभियान बन्नुपर्नेमा जोड दिनुभएको छ ।
नारायण नगरपालिका ८ दैलेखमा अवस्थित राष्ट्रसेवक बहुउद्देश्यीय सहकारी संस्थाद्वारा निर्मित डेरी उद्योगको उद्घाटन गर्दै कृषिमन्त्री केसीले सहकारीको अभियानले जनताको आर्थिक, सामाजिक तथा साँस्कृतिक रुपान्तरण हुने बताउनुभयो । “समाजवाद निर्माणको आधार सहकारी बन्नुपर्छ,” मन्त्री केसीले भन्नुभयो, “यसप्रति मेरो बढी विश्वास पनि छ ।”
सहकारीमार्फत सञ्चालन हुने उद्योगले रोजगारी सृजना हुने र त्यसले समाजवादको लक्ष्यमा पुग्न सहयोग पुग्ने बताउनुभएका उहाँले भन्नुभयो, “प्रदेश सरकारले राष्ट्रसेवक सहकारीलाई दिएको रु.एक करोड बजेट १५ दिन खान नपुग्ने र गिट्टी कुट्ने वर्ग समक्ष पुगेको अनुभूति भएको छ ।” मन्त्री केसीले साना किसानका लागि प्रदेश सरकारले ब्याजमा अनुदान दिएर विना धितो ५० हजारदेखि रु.पाँच लाख ऋण लिने व्यवस्था गरेकोले त्यसबाट लाभ लिन आग्रह गर्नुभयो ।
कर्णाली प्रदेशसभा अम्मरबहादुर थापाले डेरी उद्योग सञ्चालनले किसानहरुको दुधका बजारीकरण भएको बताउनुभयो । “प्रदेश सरकारको विपन्न लक्षित वर्ग कार्यक्रमअन्तरगत १२१ भेसी वितरणबाट उनीहरुलाई राम्रो लाभ मिलेको छ,” प्रदेशसभा सदस्य थापाले भन्नुभयो, “हिजो गिटट्ी कुट्ने वर्ग आज दुध बेच्ने तहमा आएको छ ।” शेयर सदस्य मोटाउने खालको सहकारीलाई सरकारले प्राथमिकता नदिएको उहाँको भनाई थियो ।
कृषि मन्त्रालयका सचिव डा.राजेन्द्रप्रसाद मिश्रले शहरको पैसा गाउँ भित्र्याउने माध्यम डेरी उद्योग भएको प्रतिक्रिया दिनुभयो । सचिव मिश्रले भन्नुभयो, “यसबाट महिला किसानले प्रत्यक्ष लाभ लिएका छन् । प्रदेशले डेरी व्यवस्थापन गर्दैछ ।” दुग्ध उद्योगमा दैलेखमा नमूना बन्ने भन्दै उहाँले सुर्खेतमा ठूलो क्षमताको पाउडर प्लान्ट बनाउनतर्फ सरकारले पहल गरिरहेको बताउनुभयो ।
्
रु.दुई करोड ५० लाखमा डेरी उद्योग सञ्चालन
राष्ट्रसेवक तथा उनीहरुका परिवारहरु शेयर सदस्य भएको उक्त बहुउद्देश्यीय सहकारीले रु.दुई करोड ५० लाखमा डेरी उद्योग सञ्चालन गरेको छ ।
उक्त सहकारीका अध्यक्ष खमबहादुर थापाले विसं.२०६४ पुस १६ गते स्थापना भएको र हाल आएर सबै किसानहरुलाई समेट्न सकिएको बताउनुभयो । सहकारीले प्रदेश सरकारको रु.एक करोड दलित लक्षित वर्ग विशेष कार्यक्रम र नारायण नगरपालिका दैलखको रु.४०÷४० लाख, भैसीपालन किसान साझोदरीको रु.१२ लाख १० हजार र सहकारीको आफ्नै रु.५८ लाख ५७ हजार नारायण नगरपालिका दैलेख (प्रयास÷हेल्भटास) को रु.११ लाखबाट दुग्ध चिस्यान केन्द्र निर्माण भएको जनाउनुभयो ।
सहकारीका व्यवस्थापक भूपेन्द्र खड्काले संस्थामा बहाल तथा निवृतिभरण भएका राष्ट्रसेवक र उनीहरुका परिवारसहित गरी ६६८ शेयर सदस्य रहेको बताउनुभयो । रु.६० मा प्रतिदिन ३०० लिटर सहकारीमा दुध संकलन हुने जनाउँदै उहाँले नारायण नगरपालिका ३ दैलेखका ४० दलित घरपरिवारलाई एक÷एक भैसी वितरण गरेर ‘भैंसीपालक नमूना’ बस्ती बनाईएको जनाउनुभयो ।
“हामीले दलितसहित विपन्न गैरदलित गरेर १२१ भैंसी वितरण गरेका छौं,” व्यवस्थापक खड्काले भन्नुभयो, “उनीहरुको भैंसीपालन व्यवसाय व्यवस्थित होस् भनेर पशु प्राविधिकको पनि व्यवस्था गरिएको छ । हिजो जुवातास खेल्ने, गिटट्ी कुट्ने, बेरोजगारहरुले काम पाएका छन् ।” अहिले संस्थाको रु.एक करोड शेयर पूँजी रहेको उहाँको भनाई थियो ।
भैसीपालक कृषक गणेश केसीले दैनिक छ लिटर दुध डेरी उद्योगलाई बेच्ने गरेको बताउनुभयो । दुधको मूल्य भने अपेक्षा गरेजति नपाईएको र त्यसका लागि आवाज उठाउँदै उहाँले जनाउनुभयो । शुक्रबार दैलेख पुग्नुभएका सहकारीमन्त्री केसीले प्रदेश सरकारअन्तरगत दैलेखमा सञ्चालन भएका दलित लक्षित तथा विपन्न विशेष कार्यक्रम, चक्लाबन्दी खेती प्रोत्साहन अनुदान कार्यक्रम, पशु अस्पताल तथा पशु सेवा र कृषि विकास कार्यालयको कार्य सम्पादनबारे अनुगमन गर्नुभएको थियो ।
