२५ असोज २०८०, बिहीबार
नेपाल सरकारका उपप्रधान तथा रक्षामन्त्री पूर्णबहादुर खड्काले प्रहरीले ल्याएको ‘लागु औषधविरुद्ध लालटिन अभियान’ उद्घाटन गर्नुभएको छ ।
कर्णाली प्रदेश प्रहरी कार्यालय सुर्खेतद्वारा आज वीरेन्द्रनगरमा आयोजित ‘लागु औषधविरुद्ध लालटिन अभियान’ लालटिन बालेर उद्घाटन गर्नुभयो । उक्त कार्यक्रमलाई सम्बोधन गर्दै रक्षामन्त्री खड्काले समाजमा विकराल रोगको रुपमा फैलिँदै गएको लागु औषध दुव्र्यसनी रोक्न थालिएको अभियानमा सबै सरोकारवालाहरु जुट्न अनुरोध गर्नुभयो ।
गत बैशाख १ गते आरम्भ गरिएको ‘सुरक्षित कर्णाली विशेष अभियान’ र यस अन्तरगत शुभारम्भ गरिएका कार्यक्रमको समग्र अभियान देशकै लागि रोलमोडल बनेको छ,” उहाँले भन्नुभयो, “यसको नियन्त्रण तथा रोकथामका लागि हामी सबैको साझा संकल्प आवश्यक छ । कर्णाली प्रदेशको यो अभियानले मुलुककै नेतृत्व गरिरहेको छ ।”
अपराधीले गर्ने व्यवसायलाई पूर्णरुपमा निरुत्साहित गर्न ‘लागु औषधविरुद्ध लालटिन अभियान’को सघन कार्यान्वयन आवश्यक रहेको भन्दै रक्षामन्त्री खड्काले यसमा सबै सरोकारवालाहरुको साथ सहयोग आवश्यक रहेको जनाउनुभयो । “सुरक्षित कर्णाली विशेष अभियान’अन्तरगत बिहीबार ‘पीडित सहायता कार्यक्रम’समेत शुभारम्भ गरिएको जनाउँदै उहाँले लागु औषध नियन्त्रणमा तीनै तहका सरकारहरुको सहकार्य अनिवार्य शर्त हो भन्नुभयो ।
उक्त कार्यक्रममा वीरेन्द्रनगर नगरपालिकाका कार्यवाहक प्रमुख निलकण्ठ खनालले प्रदेश प्रहरीले थालेको अभियान यहाँका नागरिकहरुको सामाजिक सुरक्षा तथा समुचित भविश्यक निर्माणका लागि भएको विचार व्यक्त गर्नुभयो । उहाँका अनुसार लागु औषधको सबैभन्दा ठूलो समस्या प्रदेश राजधानी वीरेन्द्रनगरमा भएकोले प्रहरीले थालेको अभियानमा नगरपालिका साथ दिने बताउनुभयो ।
कर्णाली प्रदेश प्रदेश प्रहरी प्रमुख प्रहरी नायब महानिरीक्षक भीमप्रसाद ढकालले कर्णालीको शान्ति सुरक्षालाई ध्यानमा राखेर थालिएको “सुरक्षित कर्णाली विशेष अभियान’ अन्तरगत १४ कार्यक्षेत्र छुट्याएर १८ कार्यक्रम तय गरिएको जानकारी दिनुभयो । लागु औषध अपराध मात्र नभई यो समाजको विकराल समस्या भएको कुरा व्यक्त गर्दै प्रहरी नायब महानिरीक्षक ढकालले नागरिकमैत्री प्रहरी व्यवहारलाई अनुभूति हुनेगरी काम गर्न अभियान थालिएको बताउनुभयो ।
उक्त कार्यक्रममा कर्णाली प्रदेश सरकारका आन्तरिक मामिला तथा कानूनमन्त्री कृष्णबहादुर जिसी, सुर्खेत जिल्लास्थित सबै पालिकाका प्रमुख÷अध्यक्ष, प्रदेश सरकारका निमित्त प्रमुख सचिव, सचिवहरु, सुरक्षा निकायका प्रमुखहरु, नागरिक समाजका अगुवा, अधिकारवादी, युवा, विद्यार्थी, पत्रकार तथा सञ्चारकर्मीहरुको सहभागिता रहेको थियो ।
