२६ कार्तिक २७, शनिबार
नेकपा (माओवादी केन्द्र)का कर्णाली प्रदेश ईञ्चार्ज शक्तिबहादुर बस्नेतले मुलुकको वर्तमान व्यवस्था माओवादी आन्दोलनको उपज भएको बताउनुभएको छ ।
वीरेन्द्रनगर सुर्खेतमा आज आयोजित एकीकृत अखिल नेपाल शिक्षक संगठन कर्णाली प्रदेश समितिको दोस्रो परिषद्लाई सम्बोधन गर्दै ईञ्चार्ज बस्नेतले आजको परिवर्तन नै माओवादीको अगुवाईमा भएको दावी गर्नुभयो । १९ दिने आन्दोलन १२बुँदे समझदारीको जगमा भएको तर्क गर्दै उहाँले गणतन्त्र, संघीयता, समावेशिता र समानुपातिक व्यवस्था माओवादीको आन्दोलनको उपलब्धी भएको जनाउनुभयो ।
उक्त सम्बोधनका क्रममा ईञ्चार्ज बस्नेतले भन्नुभयो, “शिक्षक सामाजिक चेतनाको संवाहक हो । क्रान्तिकारी चेतनाले पूर्ण शिक्षक सामाजिक रुपान्तरणका लागि अहम् भूमिका खेल्दै शैक्षिक क्षेत्रलाई मोडेल बनाउँदै लिने दिशामा नेतृत्व प्रदान गर्नुपर्दछ ।” पूर्व गृहमन्त्री समेत रहनुभएका उहाँले नेपाली जनताको त्याग र बलिदानबाट एकात्मक राज्य संरचना र व्यवस्थालाई बदलेर नोपलमा नौलो खालको लोकतान्त्रिक प्रणाली स्थापना गरिएको जिकिर गर्नुभयो ।
उक्त परिषद्मा माओवादी केन्द्रका प्रदेश अध्यक्ष राजकुमार शर्माले कम्युनिष्ट आन्दोलनको फोहर शिक्षकहरु जस्तो बौद्धिक संगठनले सफा गर्नुपर्ने बताउनुभयो । अध्यक्ष शर्माले शैक्षिक क्षेत्र मानव सभ्यताको निम्ति दक्ष जनशक्ति उत्पादनको केन्द्र भएकोले वर्तमान शिक्षा नीतिमा सुधार ल्याउन शिक्षक संगठनले अग्रणी भूमिका खेल्नुपर्नेमा जोड दिनुभयो ।
माओवादी केन्द्रका प्रदेश सचिव रामदीप आचार्यले प्रथम औद्योगिक कालको शैक्षिक प्रणालीमा आजको शिक्षा प्रणाली चलिरहेको तर्क गर्नुभयो । सचिव आचार्यले भन्नुभयो, “तत्कालीन समयमा कारखानाका निम्ति प्रयोग गरिने शिक्षा आज पनि प्रयोगमा छ । ज्ञानको न नविकरण हुन सक्यो नत रुपान्तरण नै ।” सूचना र प्रविधिको उच्चत्तम विकास भएको बेला त्यही अनुसार शिक्षाको संरचना, शैली र पद्धति बदलिँदै जानुपर्ने उहाँको भनाई थियो ।
परिषद् कार्यक्रममा संगठनका पूर्व केन्द्रीय अध्यक्ष रत्न ओलीले सामाजिक तथा शैक्षिक व्यवस्थापनका लागि शिक्षक, विद्यार्थी र अभिभावकको संयुक्त आन्दोलन आवश्यक रहेको बताउनुभयो । संगठनका महासचिव निमबहादुर केसीले निजामती कर्मचारी र शिक्षकबीचको विभेद सरकारले हटाउनुपर्नेमा जोड दिनुभयो ।
कोरोना महामारीको अवधिमा पनि देशभरका २० हजार शिक्षकहरुलाई अनलाईन आधारभूत तालिम दिईएको बताउँदै सरकारले संघीय शिक्षा ऐन ल्याएमा मात्र शिक्षक तथा विद्यालय कर्मचारीहरुका माग पुरा हुने जनाउनुभयो । “एकीकृत अखिल नेपाल शिक्षक संगठनको अगुवाईमा भएको आन्दोलन तथा संघर्षबाट शिक्षक अस्पताल बन्ने भएको छ । त्यसको साथै शिक्षक र विद्यालय कर्मचारीहरुका आंशिक माग सुनुवाई भएको छ । संगठनको अगुवाईमा आन्दोलन अगाडि बढाउनुपर्छ ” महासचिव केसीले भन्नुभयो ।
प्रदेश समितिको दोस्रो परिषद्मा एकीकृत अखिल नेपाल शिक्षक संगठन प्रदेश अध्यक्ष रेश्मीलाल चपाईंले प्रदेश तथा दशवटै जिल्लाका जिल्ला अध्यक्षहरुले जिल्लाको शैक्षिक तथा सांगठनिक अवस्था, भएका समस्या, चुनौति र समाधानका उपायका साथै अवसरका बारेमा प्रतिवेदन प्रस्तुत गरेका थिए । दोस्रो परिषद्मा संगठनका केन्द्रीय सल्लाहकार समिति सदस्य, केन्द्रीय प्रतिनिधि, प्रदेश ईञ्चार्ज, प्रदेश तथा जिल्लाका पदाधिकारीसहित करिब ३०० शिक्षकहरुको सहभागिता रहेको थियो ।
