२४ साउन २०८१, बिहीबार
कर्णाली प्रदेश सरकारका मुख्यमन्त्री यामलाल कँडेलले बजेटको प्रभावकारी कार्यान्वयनमा जोड दिन कर्मचारीलाई निर्देशन दिनुभएको छ ।
मुख्यमन्त्री तथा मन्त्रिपरिषद् कार्यालयमा आज कर्मचारी ट्रेड युनियनका प्रतिनिधिहरुसँगको छलफलमा चालु आर्थिक वर्ष २०८१÷०८२ को नीति तथा कार्यक्रम र बजेट कार्यान्वयनले मात्र नागरिक अपेक्षा पुरा हुने बताउनुभयो । “राजनीतिक नेतृत्वले नीति निर्माण गर्ने हो,” उहाँले भन्नुभयो, “त्यसको कार्यान्वयनमा कर्मचारीतन्त्रको महत्वपूर्ण भूमिका हुन्छ । पहिलो चौमासिकमै परिणाम देखाउने गरी काममा लाग्नुस् ।”
आफ्नो वृति विकास, सरुवा र बढुवामा मात्र केन्द्रित नभई नागरिकका अपेक्षा पुरा हुने गरी सेवा प्रवाह गर्न मुख्यमन्त्री कँडेलले कर्मचारीहरुलाई सुझाउनुभयो । सरकारका काम कारवाहीहरुलाई जनताले अनुभूति गर्ने गरी सेवा प्रवाह गराउन सकिएमात्र सुशासन कायम हुने भन्दै उहाँले प्रदेश सरकारले कर्णालीमा कार्यरत कर्मचारीहरुको मनोबल कमजोर हुन नदिने जिकिर गर्नुभयो । कर्णालीको समृद्धि र विकासका लागि नीति निर्माण र कार्यान्वयन तहबीचको सघन सम्बन्ध अपरिहार्य रहेको उहाँको भनाई थियो ।
