२३ साउन २०८१, बुधबार
कर्णाली प्रदेशको राजधानी सुर्खेतमा दुई छुट्टाछुट्टै सवारी दुर्घटनामा एकको मृत्युु भएको छ भने ११ जना घाइते भएका छन् ।
आज दिउसो लेकवेशी नगरपालिका ३ सुर्खेत काप्रीखोला नजिक भदन भण्डारी राजमार्गमा ट्रकले अटो रिक्सालाई ठक्कर दिदा अटो चालकको मृत्यु भएको हो । लेकवेशी नगरपालिका ४ दशरथपुरबाट लेखफर्सातर्फ जाँदै गरेको मधेश प्रदेश ०३००१ क २४९१ नम्बरको ट्रकले विपरीत दिशाबाट आईरहेको भे.१.ह ६६७५ नम्बरको अटो रिक्सालाई ठक्कर दिएको थियो ।
ट्रकको ठक्करबाट अटो चालक ४८ वर्षीया डिलबहादुर डडालीको घटना स्थलमै मृत्यु भएको जिल्ला प्रहरी कार्यालय सुर्खेतका प्रवक्ता एवं प्रहरी नायब उपरीक्षक बीरेन्द्रबीर विश्वकर्माले जानकारी दिनुभयो । उहाँका अनुसार घटनास्थलबाट ट्रकसहित चालकलाई नियन्त्रणमा लिएर आवश्यक अनुसन्धान भइरहेको छ ।
आजै वीरेन्द्रनगर नगरपालिका ८ इत्राम खोलामा विद्यार्थी बोकेर हिँडेको डिभि निकेतनको बस खोला तर्ने क्रममा चिप्लिएर दुर्घटनामा हुँदा ११ जना विद्यार्थी घाइते भएका छन् । घाइते एक जनाको अवस्था गम्भीर रहेको प्रवक्ता विश्वकर्माले बताउनुभयो । साँझ ४ः०० स्कुल बिदा भएर बस घर फर्किँदै थियो । घाइतेहरुको स्थानीय देउतीमा उपचार भइरहेको छ । बसमा ३२ जना विद्यार्थी सवार रहेको प्रहरीले जनाएको छ ।
