१४ असार २०८१, शुक्रबार

कर्णाली प्रदेशको राजधानी सुर्खेत वीरेन्द्रनगरको कालिञ्चोकमा सम्पन्न मुख्यमन्त्री कप टी–२० क्रिकेटको उपाधि सुर्खेतले हात पारेको छ । आज सम्पन्न फाइनल खेलमा रुकुमपश्चिमलाई १४ रनले पराजित गर्दै सुर्खेतले उपाधि हात पारेको हो ।

विजेता सुर्खेतलाई मुख्यमन्त्री यामलाल कँडेलले ट्रफिसहित रु.एक लाख एक हजार नगद पुरस्कार प्रदान गर्नुभयो । उक्त कपको उपविजेता रुकुमपश्चिम भएको छ । रुकुमपश्चिमले ट्रफिसहित नगद रु.५१ हजार प्राप्त गरेको छ । टस हारेर ब्याटिङको निम्तो पाएको सुर्खेतले निर्धारित २० ओभरको खेलमा ८ विकेट गुमाएर १ सय ३१ रन बनाएको थियो । त्यसका लागि कप्तान निश्चल रावलले सर्वाधिक ४३ रनको योगदान गर्नुभएको थियो ।

त्यस्तै रविन्द्रजंग शाहीले २९ र रोशन शाहीले २२ रन बनाएका थिए । रुकुमपश्चिमका लागि अर्जुन घर्ती र प्रतीक गिरीले दुई÷दुई तथा अरविन्द घर्ती, राजेन्द्र शाही र कप्तान ताराप्रकाश गिरी ‘विवश’ले समान एक÷एक विकेट लिनुभयो । जवाफी ब्याटिङमा उत्रिएको रुकुमपश्चिमले निर्धारित २० ओभरमा नौ विकेट गुमाएर एक सय १७ रन मात्र बनाउन सक्षम भयो ।

रुकुमपश्चिमका अर्जुन घर्तीले सर्वाधिक २८ रन बनाउँदा प्रतीक गिरीले २२, कुनाल रावलले २१ र विजय पुनले १२ रन बनाएका थिए । त्यसलाई रोक्न सुर्खेतका रविन्द्रजंग शाहीले दुई तथा विपिन प्रकाश शर्मा, आदित्यविक्रम शाह, कृष्ण ओली, प्रयास गुरुङ र विपिन रावलले समान एक÷एक विकेट लिएका थिए । यस प्रतियोगितामा सुर्खेतका रविन्द्रजंग शाही प्लेयर अफ त म्याच बन्नुभयो ।

आगामी मंसिरमा कर्णाली प्रदेशमा आयोजना हुने दशौं राष्ट्रिय खेलकुदको तयारी स्वरुप कर्णाली प्रदेश खेलकुद विकास परिषद्को सहयोगमा कर्णाली प्रादेशिक क्रिकेट सङ्घले आयोजना गरेको प्रतियोगितामा प्रदेशका ७ वटा जिल्लाले भाग लिएका थिए । रुकुमपश्चिम, जाजरकोट र दैलेख (ए) र सुर्खेत, जुम्ला र कालीकोट (बी) समुहमा विभाजन गरी प्रतियोगिता सञ्चालन गरिएको आयोजकले जनाएको छ ।