२० चैत २०८०, मंंगलबार
नेकपा (माओवादी केन्द्र) कर्णली प्रदेशसभा दलको बैठकले मुख्यमन्त्री राजकुमार शर्माले विश्वासको मत लिने निर्णय गरेको छ ।
आजको बसैको दलको बैठकले बुधबार विश्वासको मत लिने निर्णय गरेको हो । सत्ता गठबन्धन दलको केन्द्रीय सहमति अनुसार कर्णालीमा सरकारको नेतृत्व नेकपा एमालेलाई दिने निर्णय भएपनि कर्णालीमा सरकार गठनमा जटिलता सिर्जना भएको छ । वर्तमान प्रदेश सरकारको नेतृत्व गरिरहेको माओवादीले केन्द्रीय सहमतिले मानमर्दन गरेको भन्दै केन्द्रले गरेको निर्णयप्रति आपत्ति जनाएको छ ।
माओवादी केन्द्र प्रदेशसभा दलका प्रमुख सचेतक रनसिंह परियार मुख्यमन्त्री शर्माले भोलि विश्वासको मत लिने बताउनुभयो । “विश्वासको मत लिने प्रक्रिया अगाडि बढिसकेकोले सत्ता साझेदार दलहरुको तर्फबाट भोलि विश्वास लिन्छौं,” उहाँले भन्नुयभयो, “त्यसपछि मात्र केन्द्रको सहमतिको मर्म र निर्णय बमोजिम सत्ताको नेतृत्व जसले पाउने भनेको छ, उसलाई दिने निर्णय भएको छ ।”
उहाँले केन्द्रको सहमति विपरीत काम नहुने तर विश्वासको मत लिएर मात्र सत्ता हस्तान्तरण गर्ने जनाउनुभयो । माओवादी दलको निर्णय भइसकेपछि नेकपा कर्णाली प्रदेश ईञ्चार्ज लेखराज भट्ट र प्रदेशसभा दलका नेता यामलाल कँडेल मुख्यमन्त्री निवास पुगेर नेकपा माओवादी केन्द्रका कर्णाली प्रदेश ईञ्चार्ज कालीबहादुर मल्ल, प्रथम मुख्यमन्त्री महेन्द्रबहादुर शाही, मुख्यमन्त्री शर्माबीच सहमतिका लागि आन्तरिक छलफल भईरहेको जनाइएको छ ।
