१० पुस २०८० मंगलबार
कर्णाली प्रदेशका सात जिल्लामा टाइफाइड विरुद्वको खोप अभियान सञ्चालन हुने भएको छ । गत कार्तिक १७ गते गएको भूकम्प प्रभावित जिल्ला जाजरकोट, रुकुमपश्चिम र आसपासका अन्य जिल्ला सल्यान, सुर्खेत, दैलेख, कालीकोट र जुम्लामा खोप अभियान हुने जनाइएको छ ।
टाइफाइड खोप अभियान सञ्चालन सम्बन्धी मंगलबार वीरेन्द्रनगरमा सञ्चारकर्मीहरुसँग अन्तरक्रिया कार्यक्रममार्फत भूकम्प प्रभावित क्षेत्रमा टाइफाइड, निमोनिया, दादुरा–रुबेला लगायत अन्य सरुवा रोगको जोखिमलाई मध्यनजर गर्दै खोप अभियान आवश्यक भएको बताइएको छ ।
राष्ट्रिय खोप सल्लाहकार समितिको सिफारिस अनुसार स्वास्थ्य तथा जनसङ्ख्या मन्त्रालयद्वारा खोप अभिायन सञ्चालन हुन लागेको हो ।
२०७८ सालमा १५ वर्षमूनीका बालबालिकालाई यो खोप लगाईएको थियो । अहिले १६ देखि ४५ वर्ष उमेर समूहलाई टाइफाइड विरुद्वको टिसिभी खोप दिइने छ । त्यसका लागि दुई चरणमा समयावधी निर्धारण गरिएको छ ।
जनस्वास्थ्य सेवा कार्यालय सुर्खेतका खोप फोकल पर्सन घनश्याम बुढाका अनुसार पुस १२ देखी १५ गतेसम्म पहिलो चरण र पुस २१ देखि २४ गतेसम्म दोस्रो चरणमा खोप दिइनेछ । उनका अनुसार सुर्खेतमा मात्रै दुई लाख एक हजार जनालाई खोप लगाईने लक्ष्य लिइएको छ । सबै स्वास्थ्य संस्थाहरुबाट खोप लगाइने बताइएको छ ।
अहिले स्वास्थ्य संस्थाका ओपिडी सेवामा सबैभन्दा बढी टाइफाइडका बिरामी हुने गरेको स्वास्थ्कर्मीहरुको भनाई छ । साल्मोनेला टाइफी, साल्मोनेलीया पाराटाइफी–ए, बि,सी ब्याक्टेरीयाका कारण हुने टाइफाइडले ज्यानै जोखीममा जाने खतरा हुन्छ । यसको समयमा उपचार नगरेका करिब १० प्रतिशतले तीन महिनापछि सम्म अरुलाई सार्न सक्छन् भने पाँच प्रतिशतले पित्तथैलीमा ब्याक्टेरीया रहेर अरुलाई सार्न सक्छन् । यो क्रमलाई समुदायको न्यूनीकरणमा राख्न खोप अभियान सञ्चालन गरिएको फोकल पर्सन बुढाले जानकारी दिए ।
टाइफाइड विरुद्व खोपको प्रभावकारीता ९६.९५ प्रतिशत रहेको छ ।
कोभिड–१९ विरुद्वको खोप लगाएको कम्तिमा १४ दिन पुगेको अवस्थामा मात्र खोप लगाउन स्वास्थ्यकर्मीको सुझाव छ ।
खोप कभरेज लक्ष्य ९५ प्रतिशत राखिएको छ । त्यसमध्ये प्रदेश, जिल्लाको तुलनामा स्थानीय तहमा एकरुपता नहुनु, शुन्य खोप र ड्पआउट सङ्ख्या बढ्दै जानु, सुक्ष्मयोजना अद्यावधिक र पूर्ण खोप अभियान दिगोपना कार्यक्रम प्रभाव नहुनु, महामारी देखापर्नु लगायतका चूनौती देखिएको बताइएको छ ।
देशभरका १६ प्रतिशत बालबालिकाले अझै पूर्ण खोप लगाएका छैनन् भने चार प्रतिशत बालबालिका शुन्य खोपको अवस्थामा छन् ।
उच्च ज्वरो आउने, जाडो हुने, टाउको दुख्ने, पखाला लाग्ने, सुख्खा खोकी, पेट देख्ने, पखाला लाग्ने, भोक नलाग्ने र वाकवाकी हुनु टाइफाइडका लक्षण हुन्।
