२७ चैत २०७९, सोमबार
नेकपा एमालेले कर्णाली प्रदेश सरकारबाट बाहिरियसँगै सरकारलाई दिएको समर्थन फिर्ता लिएको छ ।
प्रदेश सरकारका मुख्यमन्त्री राजकुमार शर्मासमक्ष आईतबार आर्थिक मामिला तथा योजनामन्त्री विनोदकुमार शाह, उद्योग, पर्यटन, वन तथा वातावरणमन्त्री जीतबहादुर मल्ल र सामाजिक विकासमन्त्री टेकराज पछाईले संयुक्त राजीनामा दिनुभएको थियो । आज नेकपा एमाले कर्णाली प्रदेशसभा दलका नेता यामलाल कँडेलले प्रदेश सरकारबाट समर्थन फिर्ता लिएको कर्णाली प्रदेश प्रमुखलाई जानकारी दिनुभएको छ ।
गत पुस २७ गते नेकपा एमालेले माओवादी केन्द्र प्रदेशसभा दलका नेता राजकुमार शर्मालाई मुख्यमन्त्री नियुक्तिका लागि समर्थन दिएको थियो । एमालेको समर्थनमा माघ ६ र चैत १७ गते मुख्यमन्त्री शर्माले विश्वास मत लिनुभएको थियो । सरकारबाट एमालेले समर्थन फिर्ता लिएपछि मुख्यमन्त्रीले पुनः विश्वासको मत लिनुपर्नेछ ।
