१४ बैशाख २०८०, बिहीबार
बिलिङ्क नाओ, कोपिला भ्याली बालगृह तथा महिला केन्द्रका संस्थापक म्याग्गी डोयनको पुस्तक ‘बिट्वीन माउन्टेन एण्ड द स्काई’ नामक पुस्तक विमोचन गरिएको छ ।
वीरेन्द्रनगर सुर्खेतमा आज एक कार्यक्रम आयोजना गरी कर्णाली प्रदेशसभा सदस्यहरु, प्रशासन तथा प्रहरी प्रमुख, शिक्षक, पत्रकार तथा नागरिक समाजको सहभागितामा उक्त पुस्तक बिमोचन गरिएको हो । उक्त विमोचन कार्यक्रममा बोल्दै लेखिका डोयनले हिमाल र आकाशमा रहेको देश नेपालको सुन्दरतलाई वर्णन पुस्तकको नाम ‘बिट्वीन माउन्टेन एण्ड द स्काई’ राखिएको बताउनुभयो ।
अमेरिकाको न्यूजर्सीमा सन् १९८६ नोभेम्बर ७ मा जन्मेर १७ वर्षको उमेरमै उत्तरी भारतमा बालगृहमा स्वयंसेविकाका रुपमा काम गर्नुभएका उहाँले दुई वर्षपछि नेपालको कर्णाली आएर अनाथ बालबालिकालाई अभिभावकत्व प्रदान गर्न सुरु गरेको बताउनुभयो ।
नेपालको कर्णाली प्रदेशअन्तरगत सुर्खेतमा बालगृह सञ्चालन, कोपिला भ्याली स्कुल, महिला केन्द्र स्थापना र सन् २०१५ को सिएनएन हिरो अवार्ड जितेदेखि हालसम्म भोगेका जीवनका कथा र प्राप्त उपलब्धिहरुलाई पुस्तकमा समावेश गरिएको उहाँको भनाई छ ।
उहाँले भन्नुभयो, “पुस्तकमा यहाँका आमाहरुको माया, आशा, निराशा र पटक पटकको समयमा गुमाउँदाको पीडाका कथाहरु कोरिएको छ । मूलतः सशस्त्र संघर्षको बेला कर्णालीमा घुम्न आउँदा छ वर्षीय बालिका हिमाले नदी किनारमा परिवार पाल्नका लागि गिट्टी कुटिरहेको कारुणिक दृश्य र त्यसपछि उनको शिक्षाका लागि शैक्षिक सामग्री सहयोग गरेको कुरालाई उल्लेख गरिएको छ ।”
उहाँले अमेरिकी नागरिक भएपनि पनि हरित स्कुल बनाउने सपना लिएको भूमि नेपाल, दुर्गम कर्णाली र सुर्खेत वीरेन्द्रनगर नै आफ्ना लागि स्वर्गझैं प्रिय भएको जनाउनुभयो । म्याग्गीका अनुसार सुरुका दिनमा कठिन भएपनि अहिले सबैको साथ सहयोग पाएर अगाडि बढ्न उर्जा मिलेको छ ।
कोपिला भ्याली सेवा समाज सुर्खेतका सहसंस्थापक टोपबहादुर मल्लले विसं.२०६४ सालमा जिल्ला प्रशासन कार्यालय सुर्खेतमा संस्था दर्ता गर्दासमेत निकै समस्या झेल्न परेको दुखेसो गर्नुभयो । उहाँले भन्नुभयो, “सपना पुरा गर्नका लागि तमाम समस्या झेल्नु पर्दोरहेछ । डोयन र मैले धेरै ठूलो शिक्षा प्राप्त गरेका छैनौं यद्यपि शिक्षा दिनका लागि शिक्षा प्राप्त गर्नैपर्छ भन्ने रहेनछ ।” त्यसका लागि ईच्छाशक्ति, दृढ संकल्प र सत्विचार हुनुपर्ने सहसंस्थापक मल्लको भनाई थियो ।
