१ माघ २०८२, शुक्रबार
सुर्खेतः निर्वाचन सुरक्षालाई केन्द्रित गरेर सुर्खेत प्रहरीले तालिम प्राप्त कुकुर (के–९)सहित लागुऔषध तथा बिष्फोटक पदार्थको चेकजाँच सुरु गरेको छ ।
निर्वाचन सुरक्षालाई लक्षित गरी केनाइन शाखा कोहलपुरबाट दुईवटा तालिम प्राप्त कुकुरको सहयोगमा जिल्ला प्रहरी कार्यालय सुर्खेत, लागुऔषध नियन्त्रण शाखा सम्मिलित २५ जनाको सयुक्त प्रहरी टोलीले वीरेन्द्रनगर नगरपालिका ११ सुब्बाकुना चेक पोष्टबाट चेकजाँच सुरु गरिएको सुर्खेत प्रहरी प्रवक्ता एवं प्रहरी नायब उपरीक्षक मोहनजंग बुढ्थापाले जानकारी दिनुभयो ।
आसन्न फागुन २१ गते हुन गईरहेको निर्वाचनको अवधिमा सिमा नाकाबाट भित्रिन सक्ने अवैध हातहतियार तथा बिष्फोटक पदार्थ र लागुऔषध नियन्त्रण गर्ने ध्येयले तालिम प्राप्त कुकुरसहितको संयुक्त जाँच अगाडि बढाइएको उहाँले बताउनुभयो । उक्त चेकजाँचको क्रममा वीरेन्द्रनगर नगरपालिका ९ लाटिकोईलीका २४ वर्षीय गौरव रावललाई नियन्त्रणमा लिइएको उहाँले जनाउनुभयो ।
प्रवक्ता बुढ्थापाले भन्नुभयो, “रावललाई शंका लागेर चेकजाँच गर्ने क्रममा उनको साथबाट नापतौल नगरेको लागुऔषध ब्राउन सुगरजस्तो देखिने खैरो धुलो पदार्थ सात पोका भेटियो । भेटिएको पोकासहित रावललाई नियन्त्रणमा लिएर थप अनुसन्धानको कारवाही बढाइएको छ ।”
प्रतिनिधिसभा सदस्य निर्वाचन २०८२ को सुरक्षा व्यवस्था मजबुत बनाउन सुर्खेत जिल्लाका प्रवेश नाका, मुख्य बजारलगायत दुवै निर्वाचन क्षेत्रमा लागुऔषध, हातहतियार, विष्फोटक पदार्थ खोजी गर्न तालिम प्राप्त कुकुर, प्राविधिक जनशक्तिको सहायताले सुर्खेत जिल्ला तथा मातहत प्रहरी कार्यालयसहित सुरक्षा निकायबाट नियमित गस्ती, जाँच तथा सुरक्षा कारवाही भइरहेको प्रवक्ता बुढ्थापाले बताउनुभयो ।
