१३ भदौ २०८१, शुक्रबार
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आफू नेतृत्वको सरकारले भ्रष्टाचारविरुद्धको सुशासन अभिायनमा अहिलेसम्मकै रेकर्ड कायम गरेको बताउनुभएको छ ।
नेकपा माओवादी केन्द्र कर्णाली प्रदेश समितिको संयोजनमा कर्णाली प्रदेशको राजधानी वीरेन्द्रनगरमा आजदेखि सुरु भएको ‘कर्णालीका केन्द्रीय सदस्य र प्रदेश पदाधिकारीहरुसँगको परामर्श बैठक’मा बोल्दै अध्यक्ष प्रचण्डले माओवादी संख्याले सानो भएपनि यसको नेतृत्वमा बनेको सरकारले भ्रष्टाचार विरुद्ध र सुशासन अभियानमा रेकर्ड कायम गरेको जिकिर गर्नुभयो । यति ठूलो अभियान चलाएको देखेर विरोधी शक्तिहरुमा छटपटी पैदा भएको उहाँले बताउनुभयो ।
“यसबाट नेपाली जनतामा आशा र उत्साह पैदा हुँदै गर्दा दलाल पूँजीपति, माफिया र सामन्तवादका अवेशषहरुमा भने आतंक सिर्जना भयो,” उहाँले भन्नुभयो, “त्यसपछि नक्कली भुटानी शरणार्थी प्रकरणका फरार अभियुक्त पक्राउ भएलगत्तै कांग्रेस र एमालेको एकथरी नेतृत्व छटपटिन थाल्यो । त्यसकै परिणामस्वरुप दुई ठूला राजनीतिक शक्तिबीचको रातारात सहमतिबाट सरकार निर्माण भएको कुरा घाम जत्तिकै छर्लङ्ग छ ।”
पूर्वप्रधानमन्त्री समेत रहनुभएका अध्यक्ष प्रचण्डले माओवादी सरकारबाट बाहिरिँदा जितेजस्तो र कांग्रेस–एमालेले हारेर नेतृत्व लिएजस्तो माहौल बनेको टिप्पणी गर्दै भन्नुभयो, “यो पार्टी र आन्दोलनका लागि ठूलो पूँजी हो । अब भने उनीहरु हामीलाई कमजोर बनाउने नाममा बलिदानपूर्ण संघर्षमार्फत स्थापित गरेका एजेन्डासहितको संविधानमाथि प्रहार गर्न चाहन्छन् । हामीले अगाडि बढाएको भ्रष्टाचारविरुद्धको अभियानलाई निस्तेज कोशिस गर्दैछन् । ती सबै षड्यन्त्रका विरुद्ध जनतालाई सचेत बनाउन सुसंगठित पार्टी निर्माण गरेर अगाडि बढौं ।”
सुशासन, सामाजिक न्याय र आर्थिक समृद्धिक क्षेत्रमा मिटरब्याजीको समस्या समाधान, हजारौँ नागरिकताविहिनलाई नागरिकता पाउने व्यवस्था मिलाउनुको साथै देशबाहिर तथा भित्र रहेका लाखौं श्रमिकलाई सामाजिक सुरक्षा कोषमा आवद्ध गरी नयाँ आशाको जगाएको पनि उहाँले जनाउनुभयो । माओवादी नेतृत्वको सरकार हुँदा अर्थतन्त्रलाई श्रीलंकासँग तुलना गरेपनि अर्थतन्त्र पुनरुत्थानमा लिइएका नीतिगत पहलबाट अर्थतन्त्रमा देखिएका संकट क्रमशः समाधान हुँदै अर्थतन्त्रले पुरानै लय समात्न थालेको उहाँको भनाई थियो ।
परामर्श बैठकमा उपाध्यक्ष अग्नि सापकोटा, महासचिव देव गुरुङ, उपमहासचिवत्रय जनार्दन शर्मा, शक्ति बस्नेत, वर्षमान पुन, नेता गिरिराजमणि पोखरेल, स्थायी कमिटी सदस्य टेकबहादुर बस्नेत, सत्य पहाडी, कालीबहादुर मल्ल, केन्द्रीय सदस्य महेन्द्रबहादुर शाही, नरेश भण्डारीलगायतको सहभागिता रहेको छ । बैठक शनिबारसम्म चल्नेछ ।
