२४ पुस २०८०, मंगलबार
कर्णाली प्रदेशको राजधानी वीरेन्द्रनगर सुर्खेतमा जारी ३४औं राष्ट्रिय पुरुष भलिबल प्रतियोगितामा गण्डकी प्रदेशसहित तीन विभागीय टोली सेमीफाइनलमा पुगेका छन् ।
प्रतियोगिताको पाँचौं दिनसम्म आइपुग्दा गण्डकी, एपिएफ, नेपाल आर्मी र पुलिस क्लब सेमीफाइनलमा पुगेका हुन् । भोलि (बुधबार) बिहान १०ः३० बजे पहिलो सेमीफाईनलमा समूह ‘ए’को विजेता सशत्र प्रहरी (एपीएफ) र गण्डकी प्रदेश भिड्ने छन् । साविक विजेतासमेत रहेको एपिएफ समुहका सबै चार खेलमा शतप्रतिशत नतिजासहित १२ अंक जोड्दै समुह विजेता बनेको हो । गण्डकी भने समुह चरणमा तीन खेल जित्दा विभागीय टोली त्रिभुवन आर्मी क्लबसँग पराजित भएको थियो । यसले समुह चरणका तीन खेल जितेर नौ अंक प्राप्त गरेको छ ।
त्यस्तै, भोलि दिउँसो १ः०० बजे हुने दोस्रो सेमीफाइनल खेलमा समुह ‘बी’को विजेता आर्मीले अर्को विभागीय टोली नेपाल पुलिस क्लबसँग खेल्नेछ । पुलिस भने समूह चरणमा अर्को विभागिय टोली एपिएफसँग पराजित भएपछि उपविजेताका रुपमा नौ अंकसहित अन्तिम चारमा पुगेको हो । आर्मीले समुह चरणका चारै खेल जितेर १२ अंक प्राप्त गरेको छ ।
पुस २५ गते पहिलो र दोस्रो चरणमा हुने सेमीफाइनलका दुई विजेता टोलीहरु फाइनल खेलका लागि छनोट हुनेछन् । फाइनल खेल पुस २६ गते हुनेछ आयोजकले जनाएको छ । पुस २० गतेदेखि सञ्चालन भएको उक्त प्रतियोगिताबाट कोशी, मधेश, बागमती, लुम्बिनी, कर्णाली र सुदूरपश्चिम प्रदेश बाहिरिएका छन् ।
