१९ पुस २०८२, शनिबार
सुर्खेतः कवयित्री निरञ्जना चन्द (निरु)द्वारा लिखित कविता संग्रह ‘वनफुलको बिद्रोह’ माथि विमर्श गरिएको छ । सिम्ताली एकता समाज सुर्खेतले शनिबार सुर्खेत वीरेन्द्रगनरमा आयोजित बिमर्श कार्यक्रममा कविता संग्रहमाथि मध्यपश्चिम विश्वविद्यालयका उपप्रध्यापकद्वय डा.रेशम विष्ट र बरिष्ठ साहित्यकार वासुदेव पाण्डेयले समीक्षा गर्नुभयो ।
कविता संग्रह ‘वनफुलको बिद्रोह’माथि समीक्षा गर्दै डा.विष्टले शब्द, शैली, विषयवस्तु र शील्पकलाका हिसाबले गद्य शैलीमा लेखिएको कविताले नारी चेत, सामाजिक समस्या, त्यसका भोगाईसँग अन्तरसम्बन्धित विषयवस्तु र वर्गीय समाजमा उत्पीडित वर्गहरुको आवाजको प्रतिनिधित्व गरेको बताउनुभयो । उहाँले बहुरुपी विषयवस्तु समेटिएको कविता संग्रह सामाजिक क्रान्तिको द्योतक भएको जिकिर गर्नुभयो ।
मध्यपश्चिम विश्वविद्यालयका उपप्रध्यापक तथा बरिष्ठ साहित्यकार वासुदेव पाण्डेयले राउटे सुन्दरीलाई बिम्बका रुपमा ‘वनफुलको बिद्रोह’ उतार्न खोजिएको टिप्पणी गर्नुभयो । मानवीय संवेदनाका ज्वारभाटाहरु छचल्किएको कवितामा विद्रोही आत्माको चेतहरु अभिव्यक्त भएको उहाँको भनाई थियो । बहुसंख्यक कविताका शीर्षकहरु नारीवादी भएको बताउँदै उहाँले समाजका संस्का, परम्परा र प्रथाहरुबारे पनि उल्लेख गरिएको जनाउनुभयो ।
मध्यपश्चिम विश्वविद्यालयका पूर्व रजिष्ट्रार एवं साहित्यकार डा.महेन्द्र मल्लले कविता नारीवादी जस्तो देखिएपनि एउटा पुरुष कति जिम्मेवारीको बोझले च्यापिएको हुन्छ र उसले पीडामा पनि आँसु देखाउन नसकेको यथार्थतालाई कविताका माध्यमबाट अभिव्यक्त गरिएको बताउनुभयो । समाजमा अभाव, संकट र समस्याहरु उत्पन्न भएसँगै कवयित्री निरु जस्ता स्रष्टाहरु पनि जन्मँदै जाने तर्क गर्नुभयो ।
मध्यपश्चिम विश्वविद्यालय योजना विकास तथा अनुगमन निर्देशनालयका कार्यकारी निर्देशक डा.विष्णुकुमार खड्काले आफ्नो सिर्जनाबाट कवयित्री निरञ्जना चन्द (निरु)ले कर्णालीलाई मुलुकभर चिनाउन विशेष योगदना पुर्याएको बताउनुभयो । कविता संग्रहमा उहाँका ६१ कविता रहेका छन् । जुन कविता संग्रहमा समाजमा विद्यमान सबैखाले भावना, सोच, विचार, चिन्तन, भोगाई, समस्या र चुनौतिबारे उल्लेख गरिएको छ ।
त्यस्तै, उक्त संग्रहमा मानवीय संवेदनाका ज्वारभाटाहरु छचल्किएका छन् । कविताले विशेषगरी महिला संवेदना, सामाजिक असमानता र किनारामा पारिएका वर्गको पीडालाई सशक्त र मार्मिक शैलीमा उतारेको छ । त्यसको साथै यसले नकरात्मक नभई आत्मअस्तित्वको खोजी र स्वतन्त्रताको उद्घोष गरेको छ । यसले स्त्री चेतना, प्रकृति प्रेम र सामाजिक परिवर्तनका बारेमा समेत बोलेको छ ।
कवयित्री निरञ्जनाले समाजको यथार्थलाई अध्ययन गरिएका कुरा पानामा उतार्दा र त्यसलाई अभिव्यक्त गर्दै जाँदा प्राप्त गरेको हौसलाले आफूसहित माटोलाई चिनाउने अवसर प्राप्त भएको बताउनुभयो । उहाँका अनुसार मान्छेले भोगेका कष्ट, कहर, अन्याय, थिचोमिचो अनि जीवन विरोधी श्रृंखलाका प्रतिवादमा व्यंग्य, विरोध, आक्रोश र संघर्षको गर्जन मात्र नभई प्रकृति र सामाजिक परिवर्तनसँग सम्बन्धित विषयवस्तुहरु पनि कविता संग्रहमा समेटिएका छन् ।
विमर्श कार्यक्रममा समीक्षकद्वय डा.विष्ट र बरिष्ठ साहित्यकार पाण्डेयसहित कवयित्री चन्दलाई कदर तथा सम्मान पत्र प्रदान गरिएको थियो । उक्त कार्यक्रममा साहित्यकार, उपप्रध्यापक, लेखक, पत्रकार तथा विद्यार्थीहरुको सहभागिता रहेको थियो ।
