२३ चैत २०८२, सोमबार
सुर्खेतः कर्णाली प्रदेश सरकारका मुख्यमन्त्री यामलाल कँडेलले प्रदेशको विकासका लागि नीजि क्षेत्रको सक्रिय सहभागिता आवश्यक रहेको बताउनुभएको छ ।
नेपाल उद्योग वाणिज्य महासंघ कर्णाली प्रदेशको आज सुर्खेत वीरेन्द्रनगरमा आयोजित नवौं प्रदेश सभालाई सम्बोधन गर्दै मुख्यमन्त्री कँडेलले कर्णालीमा लगानीका प्रशस्त सम्भावना भएपनि अपेक्षित रुपमा निजी क्षेत्रको संलग्नता हुन नसकेको बताउनुभयो । कर्णाली कृषि, पर्यटन जलस्रोतको धनी प्रदेश भएको भन्दै उहाँले ती क्षेत्रलाई आधार बनाएर आर्थिक विकासको ढोका खोल्न सकिने तर्क गर्नुभयो ।
“कर्णालीमा अवसर धेरै छन्, तर ती अवसरलाई पहिचान गरेर लगानी गर्न आवश्यक छ,” उहाँले भन्नुभयो, “नीजि क्षेत्रले जोखिम लिन सके प्रदेशको आर्थिक समृद्धि सम्भव छ । यद्यपि परम्परागत रुपमा तयारी वस्तु बेच्ने प्रवृत्तिबाट बाहिर निस्केर उत्पादनमुखी अर्थतन्त्रतर्फ अघि बढ्नुपर्नेमा जोड दिनुपर्दछ ।”
कर्णालीले उत्पादन बढाउन सके मात्रै आत्मनिर्भर बन्न सकिने बताँउँदै मुख्यमन्त्री कँडेलले कृषि, जडीबुटी, जलविद्युत र पर्यटनमा ठूलो सम्भावना भएको यसमा निजी क्षेत्रले लगानी बढाउनुपर्नेमा जोड दिनुभयो । सरकार लगानीमैत्री वातावरण निर्माण गर्न र निजी क्षेत्रलाई आवश्यक सहजीकरण गर्न तयार रहेको उहाँको भनाई थियो ।
मुख्यमन्त्री कँडेलका अनुसार लगानीकर्तालाई प्रोत्साहन, नीतिगत सुधार तथा आवश्यक पूर्वाधार विकासमा सरकार लागिपरेको छ । सरकारी अनुदानको दुरुपयोग हुने प्रवृत्तिप्रति चिन्ता प्रकट गर्दै उहाँले अनुदान पाउँदा मात्र काम गर्ने र पछि छोड्ने गलत अभ्यास अन्त्य गर्नुपर्ने टिप्पणी गर्नुभयो ।
“सरकारी रकमको सदुपयोग हुनुपर्छ,” उहाँले भन्नुभयो, “काम सकिएपछि छोड्ने होइन, त्यसलाई निरन्तरता दिने दीर्घकालीन सोचका साथ परियोजना सञ्चालन गर्नुपर्छ ।” मुख्यमन्त्री कँडेलले विकासका लागि सरकार, निजी क्षेत्र र नागरिकबीच सहकार्य आवश्यक रहेको जनाउँदै विकास एक्लैले सम्भव नहुने भएकोले सबै क्षेत्रको सहकार्यबाट कर्णालीलाई समृद्ध बनाउन सकिने धारणा व्यक्त गर्नुभयो ।
